MNF President zarah kawngpui tha niin sawi

MNF Adviser K. Lalsawmvela chuan MNF President leh Chief Minister kalchhuak ta Zoramthanga hmalakna zarah Mizoramin inkalpawhna kawngpui tha tak a nei niin a sawi.

Nimin-a Aizawl Press Club-a thuthar thehdarhtute a kawmna ah MNF Adviser K. Lalsawmvela chuan Chief Minister kalchhuak ta Zoramthanga'n PMDevine hnuaiah a hranpa ngatin Union Budget hnuaiah cheng vbc. 500 a sawichhuak tih sawiin, Aizawl bypass Road chu hmasawnna lian tak tur a nih thu leh MNF sawrkar hmalakna chu sawrkar thar in tha taka a tih hlawhtlin ngei a beisei tih a sawi a. Chief Minister Lalduhoma'n kumtir lama Delhi a zin report a pekin leiverh bika harsatna a awm a, cancel hial an tum a tih leh Union Minister for Road Transport and Highway Nitin Gadkari a sawipui hnua pawm leh ni ta anga sawi chu thangthat a lak duh vang leh mipui rilru dik lova hruaikawi tumna leh a hriatchian loh vang a nih thu a sawi bawk.

K. Lalsawmvela chuan ZPM Leader leh Chief Minister Lalduhoma'n ZPM Sawrkarin EPC Mode Contract kalpui hmasa ber nia a insawi chu thu dik tawklo nia sawi bawkin, EPC Mode contract chu kum 2018 atangin State PWD in a hmang tan daih tawh tih a sawi a, Bamboo Link Road pahnih EPC Mode-a Tender chhuah a ni tih a sawi a. MNF sawrkar chhungin Zoramthanga'n Mizoram kawngpui hmasawnna tur tam tak a sawichhuak tih sawiin, heng zinga thenkhat te chu a hlawhtlinna hmuh chhoh mek a nih thu paw a sawi bawk.