AAP ten Mizoram-ah INC Candidate an thlawp dawn

Aam Admi Party (AAP) Mizoram chuan kumin-a Lok Sabha inthlan lo awm turah Candidate an nei dawnlo tih sawiin, Congress Candidate Lalbiakzama an thlawp tur thu an sawi.

AAP Mizoram President Andrew Lalremkima chuan nimin khan Aizawl Press Club-ah thuthar thehdarhtute kawmin Central-a INDIA Alliance hnuaiah Congress-te nen thawhhona an neih mek avang leh Delhi lama an hruaituten BJP paihthlak a, Democracy tundin a nih an beisei angin Mizoram-ah INC Candidate Lalbiakzama chu an thawhpui dawn tih a sawi a, kumin inthlan hunah pawh a theih ang angin an pui dawn tih a sawi bawk.

AAP Mizoram President chuan BJP sawrkarna hnuaiah Eptu Party-te rahbehin an awm nasa hle nia sawiin, Dan hrang hrangte siam tharin an pu ber Arvind Kejriwal-a chu Prevention of Money Laundering Act hnuaiah Jail-ah an khung mek tih a sawi a, ani bakah Minister pahnih pawh Jail-ah an khung mek thu leh an chet dan chuan BJP in AAP chu an hlau hle a ni tih a entir niin a sawi a. BJP-in Mizoram a MLA an neihna hmun chu uluk taka mipuiten ngaihven a tul hle tih pawh sawiin, Mizoram hmasawnna ai chuan hnam hrang hrang awmte thendarh leh inhuattir an duh ber tih a sawi bawk.