MNF in ZPM ni 100 Programme a hlawhchham nasa nia sawiin, kuthnathawktute beidawnna niin an sawi

MNF Party chuan ZPM sawrkarin ni 100 programme a siamah kuthnathawktute thlai thar lei an tum thu an sawi chu an hlawhchham leh si avangin beiseina sang tak nena thlirtute an tibeidawng nasa hle niin an sawi.

Inrinni khan Aizawl Press Club-ah chanchinbumite kawmin MNF General Secretary VL. Kroshnehzova chuan, “ZPM hian an sawrkar hma khan thlai thar Hmunphiah, Sawhthing, Aieng leh Hmarcha chu a man tur nen lam tarlangin lei an tum thu an sawi a. Sawrkarna an chan hnu ni 100 programme-ah pawh tarlangin, Asembly Budget Session an neih hmasak berah Governor an sawichhuah tir a, chu mai ni lovin kumin Republic Day-ah pawh Governor hi an la sawichhuah tir nawn leh a. Hei mai bakah hian Chief Minister Lalduhoma chuan thlai thar leina tur vbc. 110 dah a nih thu a sawi bawk a. Hetiang a nih lai hian thlai thar an lei thawm hriat tur a awm ta rih lo a ni,” a ti. 

Hmunphiah chungchang sawiin VL. Kroshnehzova chuan, “Hmun-phiah hi Vairengte chhehvelah ringawt pawh quintal 30000 bawr vel tharin, heng hi a hringin kg-ah Rs. 50-62/-in an hralh thin a. Kumin hian ni hnih bawr vel an hralh hman tihah sawrkar hmalak tumna avangin thil a kal buai zo ta a. A rate rawn tlahniam ta in a sengnaa an senso thin kg-a 25 aia sangin a hralh theih ta lova, hei vang hian ui tak chungin a thlawnin an thlirliam tak thu kan dawng. Sawrkarin a ro a lak an tum thu hriat a nih avangin N. Hlimen leh Thingthelh ami te nen Chhungkaw 20 bawr velin an pho ro a, sawrkar lam pawh an hrilh hnuin rei tak rawn ngaiventu an awm tak loh avangin ui tak chungin kg-ah 40 in an tihral tak thu dawn a ni bawk,” a ti a. “Kumin hian Hmunphiah hi ZPM sawrkar in lei tura an insawi hnuah an lei leh tak si loh avangin hralhna an hmu mumal ta lova, Vairengte leh a chhehvela chingtute tharchhuah thin dan atangin a sengna senso paihin kg. ah 37/- vel zel an hloh ang a ni a, an hloh hi quintal 30000 vel thar chhuak tura chhutin cheng nuai 1110 lai a tling a ni,” a ti bawk.

Thlai thar an lei tur an tarlan zingah Vawiin thlengin Sawhthing, Aieng leh Hmarcha pawh an lei thawm hriat tur a awm lo nia sawiin, “Sawhthing pawh kuthnathawktuten tam tak an tharchhuah laiin thlar khat lek pawh ZPM sawrkar hian an lei thu hriat tur a la awm lo a, Hmarcha leh Aieng pawh tharchhuah a awm laiin an lei thu hriat tur ala awm lo a ni,” a ti a. “Tuna kan hmuh chinah chuan ZPM sawrkar hian mipui beisei a pha lo hle a, thlai thar lei tura ni 100 programme a an sawi leh a taka an hnathawh hi mark pe dawn ila, pek tur a awmlo a. Kuthnathawktute thlai thar lei sak tura intiam siin, an mittui titla tu ah an tang ta zawk hi MNF Party chuan pawi a tiin, rim taka thawktu kuthnathawktute a tawrhpui takzet a ni,” a ti bawk.