TBC Car Rental in ngaihdam dil turin AMCRA an phut

Tunhnaia All Mizoram Car Rental Association (AMCRA) in an puhchhiatna chi hrang hrang chu TBC Car Rental chuan a dik lo nia sawiin, ngaihdam dil an phut.

TBC Car Rental neitu TBC. Lalthatluanga chuan thuchhuah siamin anmahni chu sawrkar in ‘Rent-a-Cab Scheme’ hnuaia dan leh hrai a siam zawm kim a, dik taka license a pek hmasak ber an ni tih sawiin, India President, Prime Minister leh Union Minister etc. te an lo kalin hman thin an ni tih a sawi a. MP inthlan lo awm tura anmahni motor chauh hmang anga an puh chu a dik lo tih sawiin, an motor 11 chauh an hman laiin AMCRA-a tel RR Car Rental chuan an pek aia tam tun inthlanah hian motor an pe niin a sawi a. AMCRA in Election Official zawng zawng motor pe vek anga ngaih theih tura an puhna chu a dik lo tih an sawi bawk.

Lirthei hman chungchangah Adviser to CM, TBC Lalvenchhunga (MLA) chuan inhnamhnawihna pakhat mah a nei lo a, Election Observer te motor an pe tih pawh a hre lo tih sawiin, Car Rental hmang duh zawng zawngte hian State Transport Authority (STA) in a pawmpui Car Rental zing atangin an duh duh hmang turin zalenna an nei tih an tarlang bawk a. TBC Car Rental chu AMCRA dintute zinga mi niin a meizanghlaptu ber an nih thin thu leh AMCRA member zingah dan zawm lo an awm thin avanga chhuahsan ta an ni tih an sawi bawk.