Mizoram House thu ah Supreme Court-ah kal tum

Chief Minister Lalduhoma chuan Kolkata Mizoram House neih let theihna tur a nih chuan Supreme Court thlenga an kal tur thu a sawi.

Sakawrdai tlangdung-a Campaign-a kal mek ZPM Leader leh Chief Minister Lalduhoma chuan MNF Vice President Lalchhandama Ralte MLA-in April 8, 2024 MNF Chhung Inkhawm-ah Kolkata Ballygunge-a Mizoram House chungchangah ZPM sawrkar chu Calcutta High Court laka mualpho leh mipui bum an tumna laihlan sak ang hiala a sawi chu mak a tih thu sawiin, “Ballygunge Road Kolkata-a Mizoram House awmna hi khawpui laili a ni a, hmun hla zawk Salt Lake leh New Town hmun pan pha ve lo miharsa zawkte tan chuan a hlu takzet a ni. Khawpui laili-a awm a nih avangin MNF sawrkarin an hralhna man pawh a sang hle a, cheng vbc. 38 chuang zet niin a tirah chuan a hralhna atangin hmun dangah a aia tha zawk tur Mizoram House sak kha sawi a awm a, mahse hetiang lam bawhzuina reng reng a awm ta si lova, a hralh ringawtah hmanhmawh deuha nawrna a awm a ni ber,” a ti.

MNF sawrkarin helai hmun cheng vbc. 38 chuanga an hralhnaah MoU atanga a lan danin clause pahnih laiah cancel leh theihna a awm tih Chief Minister chuan sawiin, “Mahse file-te kan zirchian hnuah Sale Deed kan la ziahpui loh avang leh a neitu thar hmanga registration tih a la awm lo bawk nen kan cancel ta a ni. Mahse mak tak maiin High Court-ah min khing a, tun dinhmunah Mizoram Sawrkar leh mipuiten thiam loh kan chang lailawk a ni ta ber mai. Mizoram House leitu Excel Vincom Pvt. Ltd. phenah hian mawng lang kukin tute emaw chu an thu niin a lang a, Mizoram rohlu, Kolkata khawpui laili a mi, heti em em maia hralh an chak hi a pawi takzet a ni,” a ti.

Ballygunge road-a Mizoram House hi kum 2019 khan sak that tura rauhsan a lo nih tawh thu leh a hnuah thiah zui niin a sakna tur ruahmanna pawh awm vek tawh chu tihral tumin an hmanhlel ta zawk tih Chief Minister chuan sawiin, “Helai hmuna Building regulations an hmanlai hi G+3 (Ground Floor bakah chhawng thum) ni bawk mahse a bul lawkah pawh In chhawng sang tak tak a tam hle a, chhawng thum bakah chhawng hnih dang sak belh theihna DPR thar siamin West Bengal sawrkara an Housing Minister leh Municipal Mayor hnenah chhawng hnih dang sak phalsakna tur dila hmalak tum mek a nih laiin phur takin High Court-ah min khing ta a, Calcutta High Court thuthlukna vang hian MNF ho an lawm hle a ni. Ram leitu Company ang maia hnehna hlado an lo chham ve chiam mai hi a zahthlak a, Mizo mipui min zah lohnaah kan ngai,” tiin “Neih belh aia kan neihsa tiral zawnga an khawsa hi a mak hle a, High Court-ah thiam chang lo mah ila, Mizoram mipuite tan Court sang zawk Supreme Court thlengin a tul angin zelin kal kan tum a, a tawp kan thleng dawn a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar