Sum Lapse awm loh avangin lawmawm an ti

ZPM Party chuan sawrkar kum 2023-2024 ah sum lapse awm lova tluang taka Financial Year tawp khar a ni chu lawmawm an tih thu an sawi.

Nimin-a thuchhuah an siamah ZPM Party chuan kum 2023-24 Financial Year Annual Closing chu Financial Year tawp ni, March 31, 2024 khan tluang taka zawhfel a nih thu leh Closing hi Finance changtu Chief Minister Lalduhoma chuan uâp-in, sum lapse awm miah lo a tluang taka Financial Year tawp khar a ni chu lawmawm an tih thu an sawi a, “Finance Minister leh thawktute inpêkna a ropui kan tiin, kan chhuâng takzet a ni,” an ti. ZPM thuchhuah chuan Sawrkar kalphungah kumtin Financial Ending hi March ni 31 zanlai dar 12:00 thleng a nih thu leh RBI lam pawhin Government Transaction khawih Agency Bank-te thlengin hemi ni-a Office kai vek turin a hriattir thin niin an sawi a, “Chutiang bawkin Treasury-a thawkte pawhin Office an kai a ngai a, RBI lamin zanlai dar 11:00-ah Server an Off dawn a vangin chumi hmaa thil tul zawng zawng inchinfel hman a ngai thin a ni,” an ti a. Kumin Financial Ending ni hi Pathianni ( Easter Sunday)-ah tak a tlak avangin Department dangte chu Office kai lovin Treasury Office-a thawktute te chauh kal tura tih an nih thu leh Finance Minister, Chief Minister ni bawk Lalduhoma chuan a mawhphuruhna a nih angin Pathianni chawhma inkhawm banah Aizawl North leh South Treasury-te a tlawh thu an sawi bawk a ni.

ZPM thuchhuah chuan hetiang a nih lai hian Party pakhat chuan Press Release meuh siamin Chief Minister Lalduhoma chu a Department enkawl dan chungchangah Pathianni bawhchhia ang hiala Sakhuana hmanga mipui rilru a diklo zawnga kawih her tuma thuchhuah an siam chu awmlo an tih thu leh Sawrkar khalhngil tumna lam aiin Politics-a inchirh thehna leh Chief Minister sawisel tumna hrim hrim a ang hle niin an sawi a, “Mihring khawsak phungah leh Sawrkar kalphungah pawh tul bik thil leh loh theih loh thil a awm fo thin a, hemi remchanga la a mipui rilru, Sakhuana hmanga a dik lo zawnga kawihher tumna hi thleng tawh lo se kan ti hle a ni,” an ti bawk. 

Comments

Popular News (Last 30 Days)

LPG man bithliah thar