Inner Line Permit (ILP) check dan ruahmanna felfai zawk a siam theih nana hmalak MZP in an rel

Mizo Zirlai Pawl (MZP) chuan Mizoram-ah Sairang thlenga Rel a lo luh thuai dawn avangin Sawrkar in Inner Line Permit (ILP) check dan turah ruahmanna felfai zawk a siam theih nana hmalak relin Zofate sumdawnna leh inchimralna kawng a kan him tlan theih nan a tul angin hmalak nise an ti.

MZP Rorelna sang ber dawttu, Federal Council Sitting vawi 47-na chu nimin khan Aizawl-a School Education Directorate Conference Hall-ah neiin an pawl Vice President C. Lalremruata chuan a kaihruai a, MZP President, Federal Council Sitting House Leader ni bawk H. Lalthianghlima chuan tlang hrang hranga MZP ten kan ram leh hnam tan ngaihtuahna an sen thar a ngai tih sawiin, “Zirlaite thlavang hauh tur leh thil diklo siamtha turin i in sangmar ang u,” a ti a. Tunhnaiah hna lak diklo leh fair lo MZP in an hrechhuak nasa em em tih sawiin, “Hei hi MZP hian dodal lo ila, siamthatu tur dang an awm lo,” a ti a. “Kan unaute buaina avangin Mizoram an lo pan khawm mek a, tawng hrang hrang an hmang a. Kan nunphung pawh a inang diak diak kher lo. Nimahsela, ramriin a thendarh tawh kan nih avangin kan in hriatthiam tawn a ngai a, i in dawh tawn hram hram ang u,” a ti bawk. 

MZP Federal Council Sitting vawi 57-na hian Agenda chhawpchhuah 7 pawmin Sairang thlenga Rel a lo luh thuai dawn avangin Sawrkar in Inner Line Permit (ILP) check dan turah ruahmanna felfai zawk a siam theih nan hmalak an rel a. Mizoram Education Department bik enkawltu tur Mizoram Education Service (MES) kan neih ngei theih nana hmalak an rel bakah Mizo Zirlaite ruihhlo laka an fihlim theih nan MZP in hmalak nise an ti a. Ram pum huapin ‘Career Awareness’ neih a nih theih nana hmalak relin Mizoram zirna in hma a sawn theih nan tuna hman mek kan Syllabus hi zirchiana a tul anga hmalak an el a ni.

Hei bakah hian MZP Federal Council Sitting hian Zofate sumdawnna leh inchimralna kawnga kan him tlan theih nana zirchianna leh inhrilhhriatna (Awareness Campaign) neih leh a tul anga hmalak relin Mizoram ‘Schedule Tribe’ list ennawn a nih theih nan chak taka hmalak ni rawh se an ti bawk.

MZP Federal Council Sitting-ah hian Adviser L. Ramdinliana Renthlei leh Peter Lalzawm-liana ten hruaitute fuihna thu an sawi bawk.