Ambassador-Designate to Myanmar in Champhai tlawh

Indian Ambassador to Myanmar mawhphurhna chelh tura ruat, Ambassador-Designate to Myanmar Abhay Thakur IFS chuan nimin khan Champhai-ah District Official, NGO leh ramri behchhana sumdawngte thutkhawm neihpuiin ramri dep khua Zokhawthar a tlawh nghal bawk.

Champhai Circuit House-a District Official, NGO leh ramri behchhana sumdawngte nen an inkawmna ah hain Abhay Thakur chuan Myanmar-a India ram palai hna a zawm hmaa a kaihhnawih mi pawimawh tak takte nena inkawmhona hun tha tak hmanho a ni chu lawmawm a tih thu sawiin, ram pahnih inkarah inlaichinna tha a awm theih nan kan zavaia tanrual a pawimawh thu a sawi a. Security leh hmasawnna chu thil kalkawp tlat a nih avangin tun dinhmunah thil tih harsa rih mahse, nakin lawkah chuan ramri kaltlanga insumdawntawnna leh hmasawnna dangte pawh dan pangngaia thawh leh theih a beisei thu a sawi a. Culture leh Tourism chawisan kawnga thawhhona, inkalpawhna kawngpui siam leh hmasawnna ruhrel dangte pawh ngaihpawimawh a nih thu sawiin, ramri kaltlanga dan lova thil tih do kawngah theihtawp chhuah tlan a pawimawh thu a sawi bakah khawvel thang leh hmasawn zelah boruak inherdanglam dan thlir chunga hmalak dan tur tha ber ngaihtuahho a tul thu a sawi bawk.

He hun kaihruaitu Champhai District Bawrhsap James Lalrinchhana chuan India ram aiawha Myanmara ram palai hna thawk mai tur Abhay Thakur-a’n Champhai District a tlawh chu District tana hun chhinchhiah tlak tak a nih thu sawiin, Champhai District mipui aiawhin thinlung taka an lo lawm thu a sawi a. Champhai District chu ramri depa awm, District pawimawh tak a nih thu leh thenawm rambuai avangin Refugee Camp 23 a awm mek thu sawiin, sawrkar tha tichaktu NGO, Kohhran, pawl leh mimal tlawmngaite nen theihtawp chhuaha buaipui an nih thu a sawi a. Ruihhlo do leh ven kawngah pawh thawhhona tha tak neih a nih thu a sawi bawk.

Ambassador-Designate to Myanmar hnenah hian NGO te chuan Free Movement Regime (FMR) tihtawp leh ramri hungte an do tlat thu an thlen a. Inkalpawhna kawngpui, raltlan chungchang, Border Trade, ramri kaltlanga ruihhlo tawlh ven chungchang leh pawimawh danga ngaihdan leh rawtna an neihte Ambassador-Designate to Myanmar hnenah hian an thlen bawk a ni.

Thutkhawm an neih zawh hnu hian Abhay Thakur chuan Zokhawthar tlawhin ramri kaltlanga insumdawntawnna leh hemi kawnga hmalaknate enfiahin a zirchiang a. Land Custom Station Zokhawthar, Immigration Check Post leh Assam Rifles COB Zokhawthar te a tlawh a, hemi hnu hian Aizawl panin a let leh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar