India himna atan inven hmasak a pawimawh tih sawi

External Affairs Minister Dr. S. Jaishankar chuan ram thenawm Myanmar tualchhung buaina avangin India himna atan inven hmasak a pawimawh tih a sawi.

Kumin Lok Sabha inthlanpui atana BJP Manifesto, ‘Mizoram Vision Document’ a tlangzarhna ah Union Minister Dr. S. Jaishankar chuan thenawm ram dinhmun thlirin India a him zel theih nan lo inven chu hna hmasa ah an nei tih sawiin, thenawm ram a buai em avangin India chuan India leh Myanmar indaidanna hung a tum tih a sawi a. Ram thenawm atangin thil tha lo tam tak leh ruihhlo alo lut nasa tih sawiin, hei hi ram thenawma thuneituten tha taka dan an kenkawh loh vang a ni tih a sawi a, tun dinhmunah chuan inven hmasak a pawimawh a, Myanmar dinhmun ziaawm lam pan se ramri hung chu an ti dawn lo tih sawiin, thil awmdan chuan thatloh lam a pan zel avangin ramri hung a inven a pawimawh hmasa tih a sawi a. Tualchhung mite chu Sawrkar laipui thil tih hrethiam tura chahin, Centre chuan mipui te ngaihdan leh duhdan te leh an Hnam ziarang te a ngaihsak reng thu leh thenawm ram te nena inunauna pawh a ngaihtuah tih a sawi bawk.

Dr. S. Jaishankar chuan India Act East Policy a hlawhtlin theih nan theihtawp chhuah a ni tih pawh sawiin, Myanmar dinhmunin ziaawm lam a pan theihloh avangin inbiakna a kal fuh theilo tih a sawi a, ram pahnih tana tha turin hmasawnna a kal mek zel a, ASEAN ram ten hemi a insumdawntawnna turin investment tih an inhuam tih sawiin, Sawhthing te pawh ngaih pawimawh zinga mi a ni tih a sawi bawk. Union Minister chuan Myanmar nena insumdawntawnna a hlawhtlin theih nan hmalakna kalpui mek a nih thu pawh sawiin, inthlan zawhah chak zawka a hlawhtlin theih nan hmalak a ni dawn tih a sawi a, Bangladesh te nen pawha insumdawn-tawnna tur ngaihtuah a nih thu sawiin, thalai te hmasawnna tur leh hmeichhe hmasawnna tur chu an ngaihtuah dawn tih a sawi a, an thiam thil hrang hrang te an hman tangkai theihna tur ruahman a ni dawn tih pawh a sawi a ni.

Dr. S Jaishankar chuan BJP Manifesto chungchang sawiin, Mizoram in hriselna kawnga hma a sawn theih nan Ayushman Bharat Card hmangin a thlawna inentir theihna cheng nuai 5 atanga cheng nuai 10 thleng mitin hman theih turin a siam dawn tih a sawi a, Mizoram a damdawi In hrang hrang thuamthatna tur cheng vbc. 1000 dah bakah Zoram Medical College chu Regional Institute of Medical Science-ah hlan chhoh an tum tih a sawi a. Zirna an ngai pawimawh dawn tih sawiin, sawrkar School thuamthatna turin cheng vbc. 300 ruahman a nih thu leh sawrkar College siamthat nan cheng vbc. 450 ruahman a ni tih a sawi a, thalaiten kutthemthiamna lama hma an sawn theih nan theihtawp chhuah an tum tih a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar