BJP do turin politics ah ka lo zuang lut - Lalbiakzama

Lok Sabha Inthlanpui-a INC Official Candidate Lalbiakzama chuan BJP do turin politics-ah a zuanglut tih a sawi.

Mizoram Pradesh Congress Committee chuan Lok Sabha inthlanpui neih tur atan Chawngte (C) leh Tlabung-ah Vantlang inkhawm buatsaihin he hunah hian an Party Candidate Lalbiakzama chuan politics a zuanluh chhan sawiin, “Ka pension tirh khan politics a luh ka tum lo. Pawl hrang hrangin an pawl-a lut turin min sawm a. Ka lo hnar zel a. Nimahsela, Central lama BJP te rorel dan ka thlirin BJP rorelna do tura ke ka penchhuak lo a nih chuan nakin zelah kan tu leh faten min la dem dawn nia ka hriat avangin BJP do turin politics ah ka lo zuang lut a ni,” a ti.

India ram hruaitu hmasate chuan hnam hrang hrang leh Sakhaw hrang hrangte chu inlungrual taka an awm theih nan India Dânpui an duang tih INC Candidate chuan sawiin, “BJP sawrkar chuan ‘India ram hi ramkhat kan nihna angin Sakhaw pakhat, Hindu Sakhua chauh hi a awm tur a ni,’ an ti a. Sakhaw tlem zawngte chunga hleihlenna a hluar chho ta hle a. Nikum chhung ringawt pawhin Kristiante tihduhna hi vawi 687 a thleng hman ta hial a ni,” a ti bawk.