State sawrkar nen thawhdun theih tur thu sawi

Lok Sabha Inthlanpui neih tura MNF Candidate K. Vanlalvena chuan thlantlin a nih chuan State Sawrkar nen ram hnuk khawihah chuan hruikhat vuana an thawhdun theih tur thu a sawi.

Pachhunga University College Students Union hruaitute nen nimin-a an inikawmna ah MNF party in Lok Sabha Inthlanpui neih tura an Candidate K. Vanlalvena chuan Rajya Sabha MP a nih chhunga ram leh hnam tana a thawhte sawiin, “MZP hruaitu kan nih laia Mizorama hnamdang sumdawngte zalen taka an inbun tur theihtawpa kan lo dodal thin khan Vawii-nah hian sumdawnnaa kan hnam chimrala kan awmlohna turin rah a lo chhuah reng a. Hnam thil avanga tan In bang ka lo zut thin te kha a hlawkna ka hmu a ni,” a ti a. Zirlai hruaitute zawhna chhangin, “India sawrkar hian kan unau Myanmar atanga rawn raltlan te hi refugee-ah ala pawm lo a. Unau kan nih tlat avangin MNF Sawrkar kalta khan India Sawrkar thu leh hla dodal in kan unau rawn tlante chu hmangaih takin a lo enkawl a. An tana thlamuanna nih ve zel hi ka tum a. India Sawrkarin a remtilo chung Parliament-ah pawh ka auchhuahpui nghe nghe anih kha,” a ti bawk.

NDA-a BJP nena thawhho chungchangah K. Vanlalvena chuan, “NDA thawhpui chung khan kan hnam leh sakhaw chungchangah chuan BJP thil tum dodaltu awmchhun ka ni a. MP (LS) atan hian mipui khawngaihna avanga thlantlin ka nih chuan he ram leh hnam tan hian ka dinna ala pangngai reng a, kan Sakhua leh hnam pawi sawina tur chi chu ka do zel ang,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar