BJP Candidate in retheihna ata kan sawrkar chhanchhuahna tura amah Vote turin a sawm
BJP Mizoram Pradesh President leh Lok Sabha Inthlanpui neih tura BJP Candidate Vanlalhmuaka hian nimin zing khan Serchhip Press Club-ah thuthar thehdarhtute kawmin Mizoram in Lok Sabha Inthlanpui a hmachhawn turah an party atanga Candidate ni tura beisei mi 6 vel an awm laiin Central lama an hotu ten an rawn sawmna chu pawma candidate a nih tak thu a sawi a. India Hmarchhak-a BJP State President zingah amah chiah Lok Sabha Inthlan-a ding an awm thu leh Symbol-a Lotus hmang tur a nih avangin Central-ah a buk a ritin thlantlin a nih chuan Minister nih theihna hun remchang tha tak a neih thu a sawi a. Kum 1972-a UT-a Mizoram hlankai a nih hnuah Dr. C. Silver-a chiah Mizoram MP zingah Central Minister la ni thei a nih thu pawh sawiin, Mizoram pawhin nasa taka a hlawkpui thu leh hmasawnna tam tak a thlen thu a sawi a, hetiang hun tha hi kan bawhpelh loh a that thu sawiin, tun Intlanpui lo awm turah pawh hian Central Minuster kan neih theihna tur hun remchang hi kan tih hlawhchham loh a pawimawh thu a sawi a. “Ram leh hnam kan ngaihtuah a nih chuan party a kan nihna dahthain April 19-ah hian in vote hlu tak hmanga min lo Vote turin kan ram leh hnam tan ka ngen che u a ni,” a ti.
BJP Candidate chuan Mizoram chu India ram State zinga thawhchhuah nei lo ber leh leiba ngah ber kan nih thu Media hrang hrangah tarlan a nih thu sawiin, nikum-a Mizoram Assembly Inthlanpui neih a nih dawn khan hemi laka Mizoram khaichhuahna turin ‘Vision Mizoram Document’ chu an lo buatsaih tawh thu a sawi a. Amaherawh chu hei hi Mizoram mipui ten kan liamtir ta tih sawiin, kumin-a Lok Sabha Inthlanpui-ah hian Mizoram mipui ten Narendra Modi-a kaihhruai sawrkar kan ringtawk tih kan lantir a nih chuan he Vision Document-a inziak aia tha hi min pek an tum niin a sawi a, “Kan ram, kan Hnam, kan Sakhua leh kan sawrkar te retheihna ata chhanchhuahna turin party sawi lovin eng Party pawh ni ila BJP Candidate i Vote ang u,” a ti.
Mizoram State BJP President chuan sawrkar laipui-ah BJP kaihhruai NDA chu a sawrkar leh ngei hmel tih sawiin, sawrkarna siam tura Seat 272 lak ngai ah BJP chu Party mal pawhin Seat 370 aia tam la turin an inbuatsaih thu leh NDA-a an thawhpui te nen chuan Seat 400 aia tam neih theih an inbeisei thu a sawi a. Central-a Ruling MP nei ve tura hma an lak thu leh chumi tur chuan Serchhip District leh Mizoram mipuite chu BJP Vote theuh tura an sawm thu a sawi bawk a ni.
Comments
Post a Comment