Zu zawrh laiin kum khata chhiah hmuh Vbc. 40-70 tling; Zawrh tihtawp hnuah Zu chhiah a tlem

Mizoram-ah Dan hnuaia Zu zawrh kum li chhunga Excise & Narcotics Department (END) Chhiah hmuh chu Rs. 2,43,78,55,154 a tling a. Hetihlai hian Zzu zawrh tihtawp a nih hnu kum nga (5) chhunga Chhiah hmuh chu Rs. 21,29,71,448 a ni.

Mizoram-ah kum 2014 khan Mizoram Liqour (Prohibition & Control) Act siam niin, January 15, 2015-ah hriattirna chhuah a ni a, March 16, 2015 atangin Dan hnuaiah Zu zawrhna dawr hawn tan a ni a. Zu zawrh a nih atangin END chhiah hmuh a nasa takin a pung a, kum 2015 atanga kum 2018 chhunga Chhiah hmuh chu kumtin cheng vbc. 40 atanga cheng vbc. 70 inkar a tling phal a ni. END tarlan danin, Mizoram Liqour (Prohibition and Control) Act hman tan, kum 2015-a Zu chhiah atanga sum hmuh chu Rs. 40,54,18,962 a tling a, kum 2016-ah Rs. 71,56,03,644, kum 2017-ah Rs. 62,89,31,799 leh kum 2018-ah Rs. 68,79,00,749 hmuh a ni.

Kum 2018-a MNF sawrkar a din hnuah an tiam angin Zu dawrte kharin Zu khapna dan siam a ni a. Mizoram (Liquor Prohibition), Act chu March 20, 2019-ah Assembly House-ah pawm niin Zu khapna kalpuina tura duan, Mizoram Liquor (Prohibition) Draft Rules, 2022 rawtna chu khatih laia Chief Minister Zoramthanga hova thukhawm Council of Minister chuan March 25-ah an pawm a. Hemi hnu hian Mizoram-a Dan hnuaia Zu zawrhna dawn hrang hrangte pawh tihtawp a ni zui ta a ni. Dan hnuaia Zu zawrh tihtawp hnu, kum 2019 atangin Zu atanga Chhiah hmuh chu a tlahniam nghal a, kum 2019-ah Chhiah Rs. 15,61,29,492 hmuh niin, kum 2020-ah Rs. 92,56,326, kum 2021-ah Rs. 94,51,198, kum 2022-ah Rs. 174,28,426 leh kum 2023-ah Rs. 2,07,06,006 hmuh a ni.

Kum 2023-a Mizoram-a sawrkar thar a din leh hnu, January 20, 2024-a CMO Conference Hall-a thuthar thehdarhtute a kawmna ah Chief Minister Lalduhoma chuan Zu zawrh leh zawrh loh chungchanga thuthar thehdarhtute zawhna chhangin, an Agenda hmabak a nih thu leh mipui huapa inrawnkhawmna an buatsaih tur thu a lo sawi tawh a. Chief Minister sawi danin Zu chungchang chu sawrkarin a ennawn ngei dawn a, engtin nge kalpui a nih dawn tih erawh sawi theih a la ni lo a ni.