Nikum-a Mizoram-a Heroin man kg 177 aiin a tam

Mizoram chhunga dan kengkawhtu hrang hrang - Police, Excise & Narcotics leh Assam Rifles chuan nikum chhung khan Heroin kgs 177.808 an man.

ZALEN chhinchhiah danin nikum (2023) chhung khan heng Dan kengkawhtu hrang hrang zingah hian Excise & Narcotics Department chuan Heroin man tam berin kg 76.058 an man a, Mizoram Police-in dawtin kg 68.55 an man bawk a, Assam Rifles-in kg 33.20 an man bawk a ni. Mizoram END hian nikum chhung vek khan opium kg 0.66, Ganja kg 179.233, Methamphetamine kg 99.506, Pseudoephedrine kg 5.943 leh ruihhlo dang thahnem tak an man bawk.

Mizoram Police chhinchhiah danin nikum chhunga ruihhlo chi hrang hrang an mante hi cheng vbc. 49 chuang hu an ni a. Police hian nikum khan Heroin kg. 68.55, Methamphetamine kg 154.172, Crystal Meth kg 49.05, Ganja kg 112.943, Pseudoephedrine kg 210.71, Opium kg 4.918 leh Codeine um 112 an man a. An thil man hlut zawng hi Rs. 49,02,42,395 a ni a. Ruihhlo kaihhnawihah hian thubuai 273 siam niin ruihhlo nena inkung-kaih mihring 385 man an ni a, heng zinga 55 hi Myanmar lam mi an ni.

Assam Rifles chuan nikum chhung khan ruihhlo chi hrang hrang cheng vbc. 956.65 hu an man bawk a. An mante hi Heroin kg 33.20, Opium kg thum, Poppy seed kg 20.540, Marijuana kg 25.950, Triprolidine tablet 98,000 leh Methamphetamine tablet 12,17,524 te an ni. Nikum chhung vek khan Assam Rifles hian kuhva rah quintal 681.03 manin heng te hi Rs. 47,31,05,500/- hu nia chhut a ni a, ramdang siam sikret case 4,134 manin hei hi Rs. 47,79,50,315/- hu nia chhut a ni bawk a, Zu pawh case 2,953 manin Rs. 1,26,77,416/- hu nia chhut a ni a, heng an thil man te hi a vaiin cheng vbc, 96.07 hu nia chhutin ralthuam chi hrang hrang engemaw zat an man bawk.

END chhinchhiah danin kum 2019 atang khan Heroin hi a hluar lehzual tan a. END hian kum 2019-ah kg 12.596, kum 2020-ah kg 11.710, kum 2021-ah kg 18.906, kum 2022-ah kg 33.418 leh nikum (2023)-ah kg 76.058 te an man a. Heng bakah hian YMA leh mi tlawmngai ten engemaw zat an man bawk.

Tunhnai chho hian Heroin man tur a tam hle a, hei hi a chhan ber chu Manipur kaltlanga khawchhak lam atanga phurh thin chu an buaina avanga paltlang a harsat avangin Mizoram chu khawchhak lam atanga ruihhlo phurhna kalkawnga an hman vang niin an sawi a. Ruihhlo buaipuitute sawi danin Mizoram chhunga ruihhlo an man tam zawk hi Mizoram chhunga tihral tur ni lovin Europe leh Middle East vela thawn tur niin an sawi a, ruihhlo tawlhnaah hian Myanmar lam mi lam mi bakah Silchar leh Karimganj district-a chengte pawh an inhnamhnawih thuk hle niin an sawi bawk.