KTP in ruihhlo do ah hmalak rel

Kristian Thalai Pawl (KTP) chuan ruihhlo do kawngah nasa zawka hmalaka KTP Member mipa, ruihhlo leh a kaihhnawih vanga thi an tam lutuk chu a tlem theih nan hmalak an rel.

Nimin Pathianni hmanga Ngopa khuaa KTP General Conference neih ah Inrinni khan Central KTP Leader, Rev. Dr. F. Pachhunga kaihhruaiin, Ngopa Chhim Veng Kohhran Biak In-ah rorel a ni a, he hunah hian thu pawimawh hrang hrang relin ruihhlo do kawnga Central KTP hmalak rawtna leh ruihhlo leh a kaih-hnawih avanga thi tam lutuk an tlem theihna tura hmalakna rawtna pawh lungrual takin an pawm a. Youth Recreation Centre puala sum thawhkhawm rawtna pawmin, kum 2024 chhunga thupui zirho atana rawtna zingah 'Aia upa zah chungchang inzirtirna ah Central KTP in hma la rawh se' tih chu pawm a ni a, kumpuan thupui atan 'Zirna leh rawngbawlna' tih chu pawm a ni.

KTP General Conference neih loh kumah a remchan dan ang zela India ram khawpuiah Central KTP huaihawtna hnuaia KTP Meet neih rawtna te, chhim bial KTP Meet chu KTP General Conference emaw, KTP Rorel Inkhawm kaltlanga rel thin rawtna te, KTP General Conference hlabu chu tlangzarh a nih ruala duhkhawp lei tur a awm theih nana hmalak rawtna leh KTP Mobile Application-ah Central KTP atanga a thlawna thu zir tur dah rawtna te chu pawm a ni a. Kum 2028-a KTP General Conference chu Mamit-ah nghatin kum 2024-25 Central KTP Budget atan cheng nuai 71.5 pawm a ni bawk. 

He khawmpui hmang tur Bawngkawn leh Bawngkawn Shalom Branch te chuanna lirthei chu Inrinni chhun khan Saichal khaw dai-ah chesualin lirthei a chuang zinga mi Rebecca Lalrinmawii (34) Bawngkawn Shalom Branch chu a hmunah a boral a, nimin khan vuiliam a ni. Hei bakah hian he khawmpui hmang tura Chhingchhip Mualpui Branch te hruaitu Bus driver Laldinliana (53), Venghnuai, Aizawl chu Zirtawpni zing khan a motor-ah kaihthawh zawh lohin a boral bawk.