Zirtirtu Transfer & Posting Rules siam mek niin dinhmun sang-a School dah te zirchian an ni dawn

School Education Department changtu Minister Dr Vanlalthlana chuan rualkhai zawka zirtirtu sem a nih theihna atan Transfer & Posting Rules siamthat mek a nih thu a sawi.

Nimin a Assembly thutkhawm ah Member te zawhna hrang hrang chhangin School Education Minister Dr. Vanlalthlana chuan Dan neih sa te tidanglamin Transfer & Posting Rules an siamthat dawn thu a sawi a, “Siam zawh a nih hunah Rules nei ringawt loin a taka hman a ni dawn. Mizoram hmun hrang hrangte Category A,B,C leh D-ah dah a ni. Sikul pakhata Zirtirtu 13 te an awm laiin pakhat chauh neite an awm,” a ti a. Zirtirtu pakhat chauh awmna sikul 66 a awm thu sawiin Education Minister chuan, “Hei hi kan sawrkar atanga kum khat chhungin tihbo vek kan tum. Department in hma an la mek,” a ti a, Zirtirtu indaihlohna beng sika ngaihtuah mek a nih thu a sawi bawk.

Education Minister chuan inthlan dawn hnaihah zirtirtu Transfer a tam thu pawh sawiin, “Political transfer chungchangah report kan dawng nasa hle. Transfer & Posting-ah Political Transfer nia hriatte chu ngaih pawimawh hmasak ah kan nei dawn,” a ti a. An Department-ah aikal la mi 532 an awm thu sawiin, “Aikal lak hi tihtawp vek theih a ni lo. Damlohna thil avangte a aikal la a awm theih a, mihring mihrinna atanga ngaihtuah a ngai,” a ti a, aikal lak chu theihtawp chhuaha tihtawp an tum thu a sawi a. Aikal la engemaw zat chu an post-ah an let leh tawh tih an hriat thu sawiin, “Lo sumdawng lawp lawpte pawh an awm. Kan umzui zel dawn,” a ti bawk.

School Education Minister sawi danin, Aizawl khawpui huamchhungah Govt. Primary School 111 leh Govt. Middle School 76 a awm a. Govt. Primary School-ah hian zirlai 7,454 awmin Zirtirtu 636 an awm a, Govt. Middle School-ah hian zirlai 4,011 awmin, Zirtirtu 634 an awm bawk a ni.

Education Minister chuan Sawrkar hmasain dinhmun sanga sikul a hlankaite chu zirchian mek a nih thu House hrilh bawkin, inthlan dawna dinhmun sanga sikul dahte dinhmun tur chungchang ah zawhna an dawn hnem thu a sawi a, “Sikulte dinhmun sanga dah an ni dawn a, an zawm turte siam a ni. Heng sikul dinhmun sanga dahte hi a nih dan tur an ni em tihte enfiah kan duh avangin dinhmun sang-a la dah rih lo turin Chief Minister hriatpuina in kan ti,” a ti a. A dik leh a tlingte chu dinhmun sangah sawrkar hmasain a lo dah tawh anga dah an nih a beisei thu sawiin, “Zirchian zawh a nih hnuah Council of Minister ngaihtuah turin chhawpchhuah leh a ni ang,” a ti a. Sikulte dinhmun sanga dahna atan hian Budget-ah sum dah a nih thu a sawi bawk.

Education Minister tarlan danin, Higher Secondary Schools 12, High Schools 120 leh Elementary Schools 48, a vaiin School 180 te chu dinhmun sanga dah (provincialised) an ni.

Comments

Popular News (Last 30 Days)

LPG man bithliah thar