Sum dinhmun a that loh thu leh kan leiba rulh dan ngaihtuah a ngaih thu Chief Minister in a sawi

Chief Minister leh Finance changtu Lalduhoma chuan Mizoram sawrkar sum dinhmun a tha lo tih sawiin, kan leiba rulh dan ngaihtuah a ngaih thu a sawi a. Sum dinhmun siamtha lova kan puk belh zel chuan kan dinhmun a chhe lutuk dawn niin a sawi bawk.

Mizoram Legislative Assembly Budget Session neih mekah Budget a tlangpui-a sawihona chu nimin khan chhunzawm lehin Finance changtu Chief Minister Lalduhoma chuan Budget-ah Capital Expenditure tam se an duh thu sawiin, “Chutih rualin, kan sum hmuh tam chuang si loa kan Revenue Expenditure hi pung a ni lo. Kan hmuh a tam avangin a pung. Tin, sawrkar hnathawk hlawh hi kumtin a pung ve zel a, Muster Roll engemaw zat Provisional Employee-ah hlankai an ni. Pension an pung chho zel. Sawrkar hnathawk hlawh leh pension hlawh atan hian kan budget atangin 45% vel a kal ral nghal,” a ti.

Eptu Leader in ZPM kaihhruai sawrkar chu Mizoram sawrkar awm tawha leiba ngah ber nia a sawi chungchang pawh Chief Minister Lalduhoma chuan chhangin, sawrkar hmasa leiba cheng vbc. 1.3 chuang an chhawm chu a chhan ber a nih thu a sawi a, leiba awm sa bakah tun sawrkarin dan phal china sum puk tur a neih bawk si avangin leiba chu a pung lo thei lo tih a sawi a. Sawrkar hmasain sum cheng vbc. 3246.71 a puk laiin, tun sawrkar chuan cheng vbc. 1992.3 puk a tum a, hei hi sawrkar hmasa sum puk aiin cheng vbc. 1254.68-in a tlem zawk dawn tih a sawi a, sum puk belh zela kal chu a him loh avangin tun sawrkar kum chu sum dinhmun siamthat nana hmangin sawrkar a insum dawn a, mipuite hriatthiamna pawh an ngen tih a sawi bawk. RBI Statement atanga a lan danin kum 2021, 2022 leh 2023-ah India rama leiba ngah ber kan nih thu pawh sawiin Chief Minister chuan, “Kum thum a zawnin leiba ngah ber kan ni tawh,” a ti bawk.

Chief Minister chuan Hmunphiah chungchang pawh sawi lehin, Session-ah Hmunphiah lei leh loh chungchanga zawhna an dawn tam thu leh hemi chungchang hi vawi engemawzat an sawifiah tawh thu an sawiin, an lei thei ta lo chu pawi an tih thu a sawi a, kum tharah mumal takin Area Wise-a thenin hma an lak tur thu a sawi a. Hmunphiah hi RR Associate in lei thei tura an insawi laiin an lei theih leh dawnloh thu Research Wing atangin hriat theih a nilo tih a sawi a, pawisa chu a awm reng thu leh amaherawh chu an theih thu an sawi avangin RR Associate te an pe a, chhinchhiah mumal loha an lo inhralh avangin tun dinhmunah Sawrkarin pawisa a pek dawnin chhinchhiah loh tam tak, mimala kal ral a awm tawh avangin a ngaihna a awm tawhlo tih a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar