Vairengte to Sairang inkar kawng Four Lane-a siam turin NHIDCL an inpeih tawh

PWD changtu Minister Vanlalhlana chuan Vairengte to Sairang inkar kawng Four Lane-a siam turin NHIDCL lam chu an inpeih vek tawh tih sawiin, Forest Clearance erawh a la fel loh thu a sawi.

Nimin-a Assembly thutkhawm ah member te zawhna leh zawh belhna te chhangin PWD changtu Minister Vanlalhlana chuan Vairengte leh Aizawl inkar kawng dinhmun leh enkawl dan te sawiin, Vairengte to Sairang inkar kawng Four Lane-a siam turin NHIDCL lam chu an inpeih vek tawh thu leh Contractor pawh an thlang fel tawh tih a sawi a. Amaherawh chu Forest Clearance a la fel loh avangin hna tan theih a ni lo tih sawiin, a fel vela hna tan turin NHIDCL chu an inpeih tawh tih a sawi a ni.

PWD Minister chuan Aizawl leh Vairengte inkar kawng chu hmun tam takah Company dangte hna enkawl leh hmun thenkhat Mizoram PWD te kuta awm a nih thu sawiin, Contractor ten an hnathawh enkawl chhunzawm kawngah an ti tha lo thin hle tih a sawi a. Vairengte leh Bilkhawthlir inkar kawng chu NHIDCL enkawl a nih avangin Mizoram PWD-in a hriatpui em em loh thu sawiin, “Bilkhawthlir to Kolasib kawng chu Mizoram PWD enkawl a ni a, an hnuaiah Sadguru Pvt. Ltd. enkawl tir an ni. Anni hian April 2, 2024 thleng an enkawl dawn a, a repair hna an thawh thuai kan beisei,” a ti a. Kolasib to Kawnpui chu NHDCIL enkawl a nih thu sawiin, “Kawnpui to Khamrang hi Mizoram PWD enkawl a ni a, repair hna thawh theih thuai tum a ni. Khamrang to Buichali chu kum 2021 khan NHIDCL kutah hlan a ni tawh a, hlan a nih hma hian Mizoram PWD chuan M/S Ratna Infrastructure Pvt. Ltd. enkawl tir,” a ti a, M/S Ratna-te hian an enkawl that loh avangin an deposit hmanga NHDCIL kawng siam hna thawh tir tum a nih thu a sawi bawk.

PWD Minister chuan Buichali to Sairang chu NHIDCL enkawl a nih avangin hriat an nei tam lo tih a sawi a, “Sairang to Aizawl chu PWD enkawl a ni a, a chhe lai siamthat tum mek a ni,” a ti. Midang enkawlah pawh kawng a chhiat chuan sawrkar a che tho tih sawiin PWD Minister chuan, “Sum awm ang angin a chhelai apiang Fur huna harsatna min thlen lohna atan siam zel a ni,” a ti bawk.