Tlawmngaihna hi Zofate phuar khawmtu, Hnam anga min dinchhuaktu a ni - Chief Minister

Chief Minister Lalduhoma chuan Tlawmngaihna chu Zofate phuar khawmtu, hnam anga min dinchhuaktu hringnun ze mawi tak a ni tih sawiin, chhuang taka ram dang mi te mithmuh-ah thehdarh leh nunpui chu a pawimawh thu a sawi bawk.

Nimin-a Chapchar Kut 2024 lawmna Aizawl Sipai Lammual-a neih ah Kut Pa, Chief Minister Lalduhoma chuan hmasang pi pu ten Kut hlim taka lawmin malsawmna an dawn theih nan leh khawtlang nuam an neih theih nan an Sakhaw tihdan urhsun takin an kalpui thin tih a sawi a, Mizo thangthar ten he zia hi chhunzawm zela Kristian zirtirna leh rinna vawng chunga Kut hman tha a tih thu sawiin, Zonun zemawi chhawmnung zel turin kalkhawmte a chah bawk. Chief Minister chuan tlawmngaihna chu Mizo thangthar zingah a da tial tial nia sawiin, Hnam nun zemawi tak chu hlut thar leh a pawimawh thu a sawi a, Hnam changkang zawk pawhin tunlai changkanna avangin an hnam zia leh nunphung an kalsan lo tih sawiin, chhuang taka Mizo Hnam tihdan tha chu thehdarh a, nun pui a pawimawh tih a sawi bawk.

Chief Minister chuan thenawm ram Myan-mar, Bangladesh leh Manipur atangin raltlan lo lut ten India mai ni lo, khawvel huapa an lo chhuan thin ram ralmuang ah an lo lut tih hria se a duh thu sawiin, ralmuang taka an awm theihna bul khawtlang leh ram dan te zawm tha tura a duh thu pawh a sawi bawk a ni.

He hunah hian Kut Thlengtu Art & Culture Minister C. Lalsawivunga chuan Zonun zemawi kalsan zawnga hmasawnna chu hmasawnna khing-bai a ni tih sawiin, Mizo mipuite chu pi leh pu te anga rinawmna, inpeizawn tawnna, thuawihna leh aia upa zahna chhawm nung zel turin a fuih bawk.

Aizawl-a Chapchar Kut-ah hian Mizo Hnam Lam leh zai chi hrang hrangte entir a ni a. Kumin-a Chapchar Kut-ah hian ‘Zonun Zemawi - Tlawmngaihna’ tih chu thupui atan hman niin hmun hrang hrangah pawh he Kut hi hman a ni.