Environment humhalh a tul zia inzirtirna neih a ni

Nimin khan Thenzawl-a Police Training School (PTS)-ah Environmental Awareness Campaign neih a ni.
Environment, Forests & Climate Change Department leh PTS Thenzawl te tangkawp in an buatsaih he Awareness Campaign hi PTS-a Principal Ruatsanga Ralte chuan kaihruaiin inlawmna thu a sawi a, Police- te chu Mizoram hmun hrang hranga an awmna hmun apiangah dan kalha chetna titlem tur leh dan bawhchhiate manchhuah kawngah an thawhhlawk thei hle tih sawiin, ramngaw leh nungcha dan lova tichereu thinte manchhuah kawngah pawh Forest Department nena tangdunin nasa takin hma an la thei tihn a sawi a. Mizoram Environment chhe mek venhim kawnga nasa zawka thawk turin Police kalkawmte chu a fuih bawk.

He hunah hian Thenzawl DFO Lalbiak-chama Chawngthu chuan Power Point Presentation hmangin kalkhawmte zirtirna a pe a. Mizoram chu Green cover thatna State ni mah ila, ramngaw tha kan neih chhiat thu leh North East States pariat zingah pawh Virgin Forest/Very Dense Forest (VDF) nei chhe ber kan ni tih a sawi a. Heti chung hian ramngaw tikang nasa State kan nih reng bawk avangin kan ramah tui harsatna a thleng chho mek tih a sawi a. Ramngaw a chereu nasat avang leh leivung paih dan dik lo avangin kan lui-ah te siltation a nasa a, hei hian kan lui tuite a tih tlem bakah kan luite pawh hun reilote chhungin Hydel Power pawh siamchhuak thei lo din hmunah a la chantir vek thei tih a tarlang bawk.

Nimin-a hun hman ah hian Rongura Hrahsel MFS (Rtd) pawhin Ramngaw leh nungcha humhalh kawnga hriattur pawimawh te a tarlang a, Environment humhalh chu mitin mawh-phurhna a nih angin kalkhawmte thawhpuiah a sawm a ni. He hunah hian Police Officer training lai mi 160 bakah Vantawng Group YMA,Then-zawl Joint MHIP leh Thenzawl khawchhunga Village Forest Development Committee pathum te atangin mi engemaw zat an tel a ni.