Thlai thar lei tur zinga Kuhva tel loh chhan sawifiah

Tualchhung-a kuhva chinte a hralhna lamah harsatna a awm hran lo nia an hriat avangin thlai thar lei tur zingah ZPM sawrkarin kuhva a dah tel lo tih Agriculture Minister PC. Vanlalruata chuan Assembly House a hrilh.

Nimin-a Assembly inkhawm ah Hachhek bialtu MLA Robert Romawia Royte zawhna chhangin Agriculture Department changtu Minister PC. Vanlalruata chuan Sawrkar in thlai thar lei tur a thlan bikah Kuhva a tel ve rih loh thu sawiin, ZPM-in Policy a lo neih sa tawh angin, thlai thar lei a tum danah a sawrkar chuan thlai va leisak tak tak lam ni lovin, Society leh loneitute inkarah a pawp awm palh hnawhna atan a dah mai zawk tih a sawi a. Sawhthing leh thlai thenkhat rate mumal lo lutuk, kuthnathawktuten an thlai china rate ngelnghet siam sak an nih loh avangin a rate hre saa hna an thawh ve theih tawh nana duan a ni tih a sawi.

Agriculture Minister chuan Minimum Support Price pe turin tuna thlai thlan bik atan cheng vbc. 110 pawh dah a ni tih sawiin, khaw tinah Society dinin Society te chu a taka leitu turah an siam dawn tih a sawi a. Kuthnathawktu ten mumal zawka thlai an hralhna turin Minimum Support Price an pe dawn tih a sawi a ni.

Kuhva chu an ngaipawimawh lo a ni lo tih Agriculture Minister chuan sawiin, a chingtute an buai vak lo a, a rate hniam avanga hralh theih loh pawh a awm vak lo tih a sawi a, a hmunah a lei thin hnamdang kalin an lei chilh mai thin tih Minister chuan a sawi a. Chutihlaiin, hlawk zawka Kuhva hralh a nih theih nan a Processing chu an ngaih pawimawh thu pawh a sawi a, chumi atan chuan Bana Kaih policy hnuaiah Kuhva chu a 'Skop' na te pawh kalpui an tum dawn thu leh a tih ro dan te dappuiin, man man zawka an hralh theih dan a zawnpui dawn tih Agriculture Minister chuan a sawi a ni.