Mizoram-ah EMRS 11 sak ni tawhin 6 din belh tum a ni

Mizoram-ah Eklavya Model Residential School (EMRS) 11 sak ni tawhin hmun dang 6-ah din belh leh tum mek a ni.

Nimin-a Assembly thutkhawm ah Member te zawhna chhangin Social Welfare, Tribal Affairs, Women & Child Development changtu Minister Lalrinpuii chuan Eklavya Model Residential School (EMRS) chu Mizoram-ah 11 sak a ni tawh tih sawiin, tunah hian 6 chu a function mek tih a sawi a, heng te hi EMRS Lunglei, EMRS Serchhip, EMRS Lawngtlai, EMRS Chawngte (Lawngtlai District), EMRS Tuipang (Siaha District) leh EMRS Ngopa (Saitual District) te an ni a. Sak lai mek (Under Construction) 5 awmin chung te chu EMRS Tlangnuam (Aizawl District), EMRS Zawlnuam (Mamit District), EMRS Bilkhawthlir (Kolasib District), EMRS Tlungvel (Aizawl District), EMRS Niawhtlang (Siaha District) te an ni tih a sawi bawk.

Tunah hian Functional EMRS 6 leh EMRS sak mek 5 bakah hmun 6-ah din belh leh tum a nih thu Minister chuan sawiin, heng te hi EMRS Hnahthial, EMRS Lungsen (Lunglei District), EMRS West Phaileng (Mamit District), EMRS Khawzawl, EMRS Darlawn (Aizawl District) leh EMRS Khawbung (Champhai District) ah din belh tum a ni tih a sawi a. Ministry of Tribal Affairs-ah sawrkar hmasa hun lai, kum 2021 khan EMRS dil belh a ni tih sawiin, Aibawk, Thingdawl, East Lungdar, Reiek, Bunghmun, Sangau, Phullen, Champhai leh Bungtlang South tan dil belh a ni, a ti a. Ministry chuan, Tribal naupangte zirna kawng hrang hranga hma an sawn zual zel theihna tur leh hmun tha an neih theihna turin EMRS hi a kalpui tih a sawi a. Zirna senso zawng zawng a thlawn vek a nih bakah Hostel siamsak an ni bawk tih a sawi a ni. Seat erawh a tlem deuh thin avangin Entrance Test tih a ngai ve thin tih a sawi bawk.

Comments

Popular News (Last 30 Days)

Vawiin-ah HSSLC Exam result