Kawlphetha siamchhuahna kawnga hmalakna tur hrang hrang P&E Minister in House-ah a tarlang

Power & Electricity Department changtu Minister F. Rodingliana chuan Lungleng khaw bula Tlawng Hydro Electric Power din turin sawrkar in hmalakna a neih thu a sawi.

Nimin-a Mizoram Legislative Assembly thutkhawm ah Tuivawl bialtu MLA leh Opposition Leader Lalchhandama Ralte zawhna chhangin P&E Department changtu Minister F. Rodingliana chuan kawlphetha MW 54 pechhuak thei tur Lungleng khaw bula Tlawng Hydro Project chungchang ah hmalakna a awm thu sawiin, a tirah Central Water Commission (CWC) ruahman dan chuan Megawatt 54 pechhuak thei tur a ni a, a hnuah CWC vekin MW 120 pechhuak thei turin hma thar an la a chutih rualin sawrkarin ngaihtuahna thar hmangin MW 24 pechhuak tura ruahman a ni leh ta zawk tih a sawi bawk.

Zawhna neitu hian Lalchhandama Ralte chuan ZPM Policy, Sustainable Development & Reform Policy (SDRP)-ah MW 54 pechhuak thei tura ruahman tum a nih thu a chuan laia tih danglam a ni leh ta chu a chhan a zawt a. P&E Minister chuan CWC ruahmanna hmasa ah Tlawng HEP hi kum 2022 a zo tura tih ni mah se, a lui enin MW 120 pechhuak thei tur leh 2024-a zawh hman turin an thlak a, ZPM policy-ah Multipurpose Dam' siam turin an ti a, DPR siam turin hmalak mek a nih thu a sawi a. Tlawng lui chu Thal laia tui a kang thin avangin Fur laia tui tam tak luangral chu Aizawl tui lakna atan bakah khualzin hip tura cheibawl theih tur a nih avangin MW 24 hi chu hmun dang atanga sum an hmu lo a nih pawhin State sawrkar pawhin an phak a nih chuan a theih ang tawka hmalak dan turte pawh an ngaihtuah tih a sawi a, DPR hi la tih zawh a nih loh avangin a chim tur chin leh Compensation pek ngai a awm dawn tih la hriat theih a ni lo tih a sawi a ni.

Power mamawhna a san zel thu leh tun atanga kum 5-ah chuan lirtheite pawh Electric Current hman uar tum a nih tawh dawn avangin hmarchhak lam, Mizoram telin Hydro Electric Power siamchhuah kawnga tang turin Union Power Minister-in a hrilh tih P&E Minister chuan a sawi a. Chuvangin Tuivai khuahna turah pawh Central lam an inhawng angreng viau tih a sawi a. Tuivai lui khuah tum chu a tirah MW 210-a ruahman a ni a, an zirchian hnuah MW 150 vela tih tlain tui chim chin tur ram a zim a, a khuah man a hautak dawn loh a, State sum lakluhna atan an ruahman thu a sawi bawk a ni.

Heng bakah hian Mat lui pawh a ram laili taka awm a nih avangin a tangkai dawn thu leh a khuaptu tur an zawng thar mek tih a sawi a. Hydro Power neihna turin Investigation, DPR siamna leh a tul anga hman atan tun sawrkarin cheng vbc. 7 a dah tih a sawi bawk.

Comments

Popular News (Last 30 Days)

LPG man bithliah thar