Bomb hmanga Aizawl beih ni-ah ‘Zoram Ni’ hmang

Kum 1966 March 5-a Bomb hmanga Mizoram beih a nih cham-phaphak, 'Zoram Ni' chu Mizo Zirlai Pawl (MZP) General Hqrs. buatsaihin nimin khan Aizawl-ah hman a ni a, he hun hi Home Minister K. Sapdanga chuan khuallian niin a hmanpui a ni.

School Education Conference Hall, Aizawl-a 'Zoram Ni' hmanna ah hian Home Minister chuan Mizo hnamin kan tawrhna chu theihnghilh chi a ni lo tih sawiin, MZP in a tha zawnga kumtin a hmang chu lawmawm a tih thu a sawi a. “Jet Fighter hmanga Mizoram beih champhaphâk hi hnam hmangaih tharna a nih ngei ka beisei a ni,” a ti a. “Khawvel hmun dangah pawh an ram leh hnam in harsatna an tawh ni hi a tha zawngin an hmang thin tih a sawi bawk.

Kumin-a Zoram Ni-ah hian thupui atan 'Zofate insuihkhâwmna hmathlir' tih hman a ni a, MZP President H. Lalthianghlima chuan Ram leh hnam in hun harsa a tawh hi theihnghilh mai chi a ni lo tih sawiin, “Phuba lak tumna leh thinrim tharthawhna tur a ni lova, hnam anga tanrualna leh inpum-khatna ni atan i hmang ang u,” tiin, “Zofate kan lo inlungrual a, kan inpumkhat hi kan hnam dinchhuahna tura thil pawimawh a ni,” a ti a. MZP chu zirlai pawl a nih angin, Zirna tih hmasawnna tura hnathawh hrang hrangte ngun takin an endik dawn tih a sawi a, a theih ang angin sawrkar an thawhpui dawn thu leh thil diklo ah chuan an sawisel hreh dawn lo tih a sawi bawk.