State Level Skills Competition-2024 kharna neih a ni

Labour, Employment, Skill Development & Entrepreneurship (LESDE) buatsaih ni hnih awh State Level Skills Competition-2024 chu nimin khan a kharna neiin State aiawha National Level Competition tel turin mi 16 thlanchhuah an ni.

State Level Skills Competition-2024 kharna hun hi LESDE Department-a Addl. Secretary K. Lalhmingliana chuan hmanpuiin, Mizote Skills lama kan san zia leh India ramah pawh langsar thama kan awm theih thu a sawi a, Skills hmangin kan ram kan hnam hi nasa taka kan chawikan theih thu a sawi a. Thalaite ah Skill Development lama harhtharna a thleng zel a, heng avang hian kan ITI-a zir duhte pawh an in chan vek lo thin tih sawiin, “Lehkha kan zir rualin thiam thil zirna lam kan ngaih pawimawha tul hle a ni,” a ti bawk.

Kharna inkhawmah hian LESDE Department Director Angela Zothanpuii chuan Intihsiak buatsaih dan tlangpui a sawi a, Khawvel a Skills lama Intihsiakna lian ber, Skills Olympic an tih bawk, Worldskills Competition 2024, Lyon, France-a neih tura India aiawh tur thlanna Indiaskills Competition-a tel turin State aiawh Intih-siakna hi March ni 5 leh 6 chhung khan Aizawl hmun hrang hrangah kalpui niin mi 47 an tel a, an zing atang hian mi 16 thlanchhuah an ni.

Heng thlanchhuah te hi thla khat chhung an Trade theuhah chher hriam belh an ni anga, kumin April thla tawp lama National Competition awm turah Mizoram aiawhin Intihsiak an hmachhawn dawn a ni. Indiaskills Competition-ah hian Mizoram hi kum 2022 atang khan a tel tan a, a tel hmasak berah hian Shoe Making-ah Gold Medal leh Floristry-ah Silver Medal a lo dawng tawh a. Kumin ah hian Mizoram tan Medal tam zawk hawn tur leh India aiawha Worldskills Competition 2024-a tel tur an awm ngei theih nan hmalakna an kalpui mek a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man