Dan lova Saphu kawr phurh Vairengte-ah man a ni

Mizoram pawn atanga dan lova Saphu kawr lakluh tur nia hriat kg. 98 leh a phurtu chu Environment, Forest & Climate Change Department Kolasib Division chuan niminpiah khan an man.

Kolasib DFO Margaret Lalramchhani sawi danin, Saphu kawr te hi Maxi Cab service ML-0B-6858 hmanga rawn phurhluh tum niin niminpiah zing dar 5:30 vel khan Vairengte Excise Checkgate-a an bungrua te enfiah a nihin Saphu kawr an phur tih hriat a ni a, Forest Department hotute hriattir an nih hnuah Excise Department chuan Kolasib DFO Office thleng rawn hruaiin man a ni ta a ni.

Maxi Cab khalhtu Daniala (29), Salganga, Cachar chuan Shillong leh Aizawl inkara Service thin a nih thu leh a thilphurh te chu Happy Valley, Shillong-a Sumo Counter atanga a phurh thu a sawi a, Counter nghaktute hian Vawksa rep tia sawiin, Aizawl Sumo Counter-a dah turin an hrilh niin a sawi a. Driver chuan a hmain a thian ten an bum tawh thu leh Zu a lo phurh tawh vangin tun tumah hian Aizawl-a Court-a inlan a ngaih vanga bungrua te chu rawn phur chho a nih thu a sawi a, Saphu kawr bakah bungraw dang Sofa nen Rs. 6,000 hlawh turin a phur ta niin a sawi a. A thilphurh chu Vawksa rep tia an sawi bak engnge a nih hre turin a en loh thu leh an bungrua phurh hrim hrim an en ngai lo tih a sawi bawk.