Bangladesh sawrkar leh KNF ten inbiakna nei leh

Bangladesh sawrkar leh Kuki-Chin National Front (KNF) Palai te chuan a tum hnihna atan inremna siam tumin inbiakna an nei tih Kuki-Chin National Front (KNF) hruaitute chuan an sawi.

KNF a Information &Intelligence Branch (IIB) ami, Colonel invuah Solomon-a chuan Bangladesh-a Chittagong Hill Tract-ah remna leh muanna tluantling a awm theihna turin he inbiakna hi neih a nih thu a sawi a, Inbiakna hmasa ber chu Munlaipara Community Centre, Bandarban-ah nikum November ni 5 khan neih a lo ni tawh a. He inbiakna neih zawh takah hian KNF atangin Lalzawngmawi, Lalsanglawm, Lal Englian, Graham, Pastor Vanlian, Ruallin Bawm, Sangpah Khumi leh Azo Lushai te chuan Kuki-Chin te ai an awh tih sawiin, Bangladesh sawrkar aiawhin Peace Establishment Committee (PEC) Chairman leh Deputy Commissioner Office, Bandarban Hill District aiawh bakah Superintendent of Police, Bandarban Hill District leh Directorate General of Force Intelligence) hotu te an tel a ni.

KNF hian Chittagong Hill Tract-a Kuki-Chin mi te, an pi leh pu te atanga ram an lo neih tawh humhalh nan leh mahni inrelbawl sawrkar din anih theihna atan ralthuam kengin hnam chhan nan Movement an kalpui tih Solomon-a chuan a sawi a. KNF lam atanga thu dawn danin, inbiakna hi boruak tha tak hnuaiah lungrual taka inremna siam theih beiseina sang tak nen neih a. Remna zawnga inbiakna neih chhung hian an pahnih hian inkah tihtawp remti in, sawrkar palaite chuan inbiakna vawi thumna neih thuai tura ruahmanna siam turin KNF an ngen bawk a ni.

State Home Department record in a tarlan danin, nikum January 25 thleng khan Bangladesh atanga raltlan 1,167 chu Mizoram-ah an awm a, an vai hian Mizoram chhim lam ber Lawngtlai District-a inkhuar vek an ni a. A tir lamah chuan Mizoram-Bangladesh venhimna enkawltu Border Security Force (BSF)-te chuan raltlante hi Mizoram-ah luh an phal sak lova, amaherawhchu, State sawrkarin tanpui ngaite tuamhlawm an ngaih avangin Humanitarian ground atanga thlirin raltlan te hi tuamhlawm a remtih hnuah Lawngtlai District-ah humhimna hi pek an ni leh ta a ni.