Siaha-ah Model Career Centre (MCC) hawng

Tualchhunga hna zawngtute leh hna thawh tur neite inkarah Palai hna thawk tur, Model Career Centre (MCC) chu nimin khan Siaha-ah hawn a ni.

Labour, Employment, Skill Development and Entrepreneurship (LESDE) Department hnuaia sak Model Career Centre (MCC) hi Siaha mipuite, a bik takin thalaiten tangkai taka an hman turin lawm takin a hawng tih Siaha District Bawrhsap Lalhmunsanga Hnamte chuan sawiin, LESDE Director a nih laiin theihtawp a lo chhuah tawh thin thu leh tuna hawn theih a ni ta chu lawmawm a tih thu a sawi a. Tunlai thiamna sang zelah lehkha zir mawl tawp a hun tawh lo tih sawiin, tum mumal leh awmzia nei zawk a zir a hun tawh hle tih a sawi a, zirlaiten harsatna an neih ang angte leh thalai ten puih an ngaihna a puih theihna tur Model Career Centre (MCC) , Siaha-ah ngei hawn a ni chu hmasawnna ropui leh tangkai tak a nih thu a sawi bawk.

He hunah hian LESDE Employment Officer Reuben Kompa chuan Model Career Centre (MCC) nihphung tlangpui sawiin, MCC hian tualchhung thalaite leh hna zawngtu tan an chhehvelah hna a awm tih a enfel thin ang a, hna zawngtu leh hna thawh tur neite inkarah palai hna a thawk thin dawn a. MCC hnuaiah hian Young Professional (YP) awmin Young Professional hian College hrang hrangah Outreach Activities zirlai leh zirtirtute inkarah inpawhtawnna tha awm turin an thawk thin dawn a. Career Center Services leh National Career Service Portal pawimawhna mipuite hnena puanzar bakah registration-ah te an pui thin dawn a ni. Tun dinhmunah Siaha tan Young Professional tur dilna hun hawn mek niin pek an nih hma chuan Young Professional hna hi Employment Officer in a lo thawk dawn a. Zirlaite tan Career Guidance an buatsaih theih bakah hna zawng mekte an pui thei bawk a ni.