Serchhip-ah Chapchar Kut 2024 Agriculture Minister hova hman a ni

Chapchar Kut 2024 chu Mizoram hmundangte rualin nimin khan Serchhip-ah pawh uar taka hman a ni a, Agriculture Minister PC. Vanlalruata chuan Kut Pa niin a hmanpui a ni.
Serchhip Sports Complex-a Chapchar Kut 2024-ah hian Kut Pa Agriculture Minister, PC. Vanlalruata chuan Mizote Kut pui ber Chapchar Kut hmangtute Chibai bukin duhsakna a hlan a. Pi pu chena kan hnam rohlu Zonun zemawi a nun reng theih nan Chapchar Kut kan hmang thin tih sawiin, he Zonun mawi hi kan nunah a bet reng tur a ni, a ti a. Hmanlai chuan he Kut hi zu leh sa nen an hmang thin a, Kristian kan nih hnuah chuan zu leh ruihhlo tel lovin hlim takin kan hmang thin tih a sawi a. Kan hnam luhchilh a, kan thalaite runtu ruihtheih thil laka fihlim turin mipuite a chah a. Kalphung thar sawrkar chuan ruihtheih thil, mipat hmeichhiat hmansualna leh eirukna laka fihlim sawrkar leh Society siam a tum tih sawiin, mipuite kan intodelh theih nan kuthnathawkte hmasawnna atan sawrkarin ttan a la dawn tih a sawi a. Intodelhna lamtluang zawh tur leh hmalam pan tura an rilru te siam thar tura mipuite chu sawmin, Hnam dangte tan pawh a entawntlak, Mizo hnam ropuia siam turin Chapchar Kut hmangtu zawng zawng te a chah a ni.


Serchhip-a Chapchar Kut hman hi Serchhip Sub-Hqrs. YMA President Kawlthuama chuan kaihruaiin Kut Thlengtu, Serchhip District Bawrhsap David Lalthantluanga chuan inlawmna thu a sawi a, Pathian in kan hnam rohlu kan chhawm nun zel theih nana min pek, Chapchar Kut ropui taka kan hmang thei kan vanneihzia sawiin, “Kan pi leh pu ten he Kut hi inremna ni leh induhsakna ni atan an lo hman thin angin, keini pawhin induhsak tawnna nen, hlim leh phur taka he ni hi hmang turin mipuite a chah a. Zonun zemawi - Aia upa zaithiamna, Tlawmngaihna, Rinawmna, Taimakna, Dikna leh Huaisenna kan vawn nun leh kan chawisanna ni atan i hmang ang u,” tiin kalkhawmte a sawm a ni.

Serchhip-a Chapchar Kut hman ah hian Kut Pa a lo thlen veleh Khuallam hmanga lo dawngsawngin MUP District Hqrs. Serchhip ten Hlado Chhamin Silai kah a ni a, YMA Branch 15 ten a huho-a Cheraw (Kantluang) entirin YMA Chhang Branch 17 ten Tang Lam an entir a. MHIP Sub-Hqrs. Serchhip in Par Lam entirin Goodwill English Academy ten tunhma atanga Mizo Inthuam dan chi hrang hrang an entir a, Naupang Pawnto, Mizo Infiamna leh Hnam Lam dang te entir ni bawkin MZI leh Serchhip Sub-Hqrs. YMA Zaipawl bakah mimal zai engemaw zat a awm bawk. Kum engemaw chen Leisekawt Field-a Chapchar Kut hman a nih hnuah a tum khatna atan Phullem Phah chunga Chapchar Kut hman hi mipui ten an hlutin Chapchar Kut hmang tura kal pawh an tam hle a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni