Meidum-a Gas hmuhchhuah tawh lakchhuahna tur hmun tha thlan fel a ni tawh

Oil and Natural Gas Corporation (ONGC) (Exploration)-a Director Sushma Rawat Sushma Rawat-i  chuan Meidum-a Gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh tih sawiin, Mizoram-a Oil leh Gas lakchhuah hunah Mizo thalai Geology lama thiamna neite tan hna a tam dawn niin a sawi.

ONGC (Exploration)-a Director Sushma Rawat-i hian Chief Minister rawn hmu turin Inrinni khan Aizawl a rawn thleng a, Aizawl a rawn thlen velah Chief Minister Lalduhoma chu a chenna, Chief Minister Bungalow-ah kawm nghalin Meidum-a Gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh tih sawiin, nimahsela, heng hmuna an khawl te lakluhna turin Chhimluangtê lui-ah Mizoram sawrkarin Lei a dawh mek a, hnathawh a muang avangin an duh hunah hna an tan thei lo niin a sawi a, Lei dawh hi hmanhmawh sak turin a ngen bawk.

Mizoram hmun thenkhata lei chhung atanga Gas irhchhuak a awm thu pawh sawidunin, heng Gas irhchhuahna (seepage) te hi a rang lama tlawhchhuaha, zirchianna neih thuai nise an ti a. Hemi thuah hian Chief Minister hian, Mizoram chhunga Gas/Oil irhchhuahna hria apiangten a awmna Khua, Lirthei kal theih chin atanga a hlat zawng, a Thalak emaw, Video tawi leh thil tul dang awm te ama Social Media kaltlangin emaw, Whatsapp number 8730970574-ah emaw, email-ah cm@mizoram.gov.in-ah thawn turin mipuite a ngen a ni.

ONGC (Exploration)-a Director chuan Mizoram-a Oil/Gas lakchhuah hunah Mizo thalai Geology lama thiamna neite tan hna a tam dawn hle tih Chief Minister hi a hrilh a. Chief Minister chuan, Mizo thalaite Geology zirna lam lo uar tura ngenin, a zirna hmun pawh a theih ang a tihlen dan sawrkarin a ngaihtuah tur thu a tarlang a. ONGC te hian Mizo thalaiten Geology lam zirna an uar deuh deuh theih nan a tul anga Mizoram sawrkar thawhpui an inhuam thu an sawi a. An sum leh pai senga zirlaite tana field trip buatsaih te, zirlaite hnena training/interaction rawn pek te leh Dehradun-a ONGC Institute lama Practical Exposure buatsaih sak te pawh an inhuam thu an sawi a, indawr zui dan tur pawh an ruahman nghal bawk.

February 11, 2024 khan Chief Minister leh Dr. Pallavi Jain Govil IAS, Director General of Hydocarbons, Ministry of Petroleum & Natural Gas, Exploration Strategies and Production Policy te chu Delhi-ah an lo inkawm tawh a, heta an inkawmna bawhzui hian Sushma Rawat-i hi Mizoram-ah rawn kalin Chief Minister nen hian an inkawm a, ONGC atangin Suresh S. Mayal, Chief General Manager leh Pu Bipul Gohain, Assistant General Manager ten an rawn zui bawk a ni.