POSHAN Pakhwada (Nutrition Fortnight) hawnna nei

Social Welfare, Tribal Affairs & Women & Child Development Minister Lalrinpuii chuan nimin khan Aijal Club Park-ah POSHAN Pakhwada (Nutrition Fortnight) 2024 chu a hawng.

POSHAN Pakhwada (Nutrition Fortnight) hawnna hunah hian Social Welfare Minister chuan Mission Saksham Anganwadi & POSHAN 2.0 hnuaiah naupang kum thum atanga kum ruk inkarte Anganwadi Centre-a an nun bul tan nana thiam thil pawimawh zirtir leh nu naupai, nau pawm, naupang piang tir atanga kum ruk (6 yrs) hnuailam leh tleirawl ten an kum mil a zira inkhaidiat taka chaw tha khamkhawp an dawn theih nan leh chaw tha khamkhawp an dawn loh avanga natna chi hrang hrang (thanthu, cher lutuk leh zang lutuk) um bo tum a nih thu a sawi a. Nu naupai leh naupawm laite bakah hmeichhe tleirawlten chaw tha hmuh mumal loh vanga harsatna an tawh theih thisen tlakchhamna (Anaemia) laka venhim tum a nih bawk thu sawiin, Nutrition Fortnight hi Mizoram chhunga District khawpui zawng zawngah leh ICDS Block zawng zawngah activity calendar behchhana hman a nih tur thu a sawi bawk.

He hunah hian he Department-a Director leh Poshan Bhi Padhai Bhi-a Nodal Officer Zoramthangi Chhangte chuan Poshan Bhi Padhai Bhi chungchang a sawifiah a, a awmzia chu ‘Ei tha pe la, zirtirna pe bawk rawh’ tihna a ni tih sawiin, Early Childhood Care and Education Programme niin, Ministry of Women and Child Development hnuaia Saksham Aganwadi and Poshan 2.0 hmalakna thar a nih thu leh he hmalakna in a thil tum langsar zualte a sawi zau bawk.

POSHAN Pakhwada (Nutrition Fortnight) hi kum 2018-a POSHAN Abhiyaan a lo pian atang khan kumtin March thla-ah thupui hrang hrang neiin hman thin a ni a, kuminah pawh hian thupui hrang hrang hmanga beihpui thlak tur niin Poshan Bhi Padhai Bhi (Education along with Nutrition) hnuaiah Naupang ten chaw tha kham khawp an dawng chunga nun bul tan na a thiam thil pawimawh zirtirna neih a ni anga. Tribal, Traditional, Regional & Local Dietary Practices focused Sensitisation around Nutrition hnuaiah kan ei leh in chin dan thante hrisel zawka kan hman theih nan a her rem dan tur inzirtirna neiin Health of Pregnant Women and Infant & Young Child Feeding (IYCF) Practices hnuaiah Nu naupaite hriselna ngaih pawimawh leh naupang ten an kum mil a zira inkhaidiat taka chaw tha khamkhawp an dawn theih nan an ei leh in tur pek dan inzirtirna te neih a ni bawk ang.

Nimin-a he hun hman hi Social Welfare, Tribal Affairs & Women & Child Development Department Joint Secretary Zonunthari chuan kaihruaiin Department of Ayush chuan Yoga demonstration an nei bawk a ni.