Kawl theih zat aia tam mihring leh lirthei kawl enthla

General Administration Department (GAD) changtu Chief Minister Lalduhoma chuan sawrkar hnathawk zingah an kawl theih zat aia tam mihring leh lirthei kawlte an enthlak mek thu a sawi.

Nimin-a Assembly inkhawm zawhna leh chhanna hunah MNF Member K. Laldawngliana zawhna chhangin GAD changtu Chief Minister chuan, “Mizoram sawrkar hnuaia thawk Officer zingah danin an kawl theih zat bituk aia tam mihring leh lirthei kawlte chu February, 2024 chhunga inchingfel tura tih an ni,” a ti a. Hemi hnua la kawl luite chu enzuitu an indah thu sawiin, “A tul angin an chungah action lak a ni dawn,” a ti bawk. Chief Minister sawi danin, Mizoram sawrkar hnuaiah danin a phal chin bak mihring kawl an awm hriat a ni lo a. Officer ho zingah lirthei dawng thei chin ni lo dawng emaw an awm a nih pawhin enzui a ni anga, an ni pawh February thlenga hun pek zingah an tel ve bawk a. Enthla tura an ruat ten an rawn report chuan a tul angin action lak a ni dawn a ni.