ZPM in Lok Sabha inthlan-a Candidate puangin MP nilai in chuh a tum tawh loh thu a sawi thung

Lok Sabha Inthlanpui lo awm tur atan Political Party hrang hrangte an inbuatsaih mek a, ZPM Party chuan Richard Vanlalhmangaiha (Richie) chu an Candidate atan ruat a nih thu nimin khan puangin Lok Sabha MP nilai C. Lalrosanga chuan chuh a tum tawh loh thu a sawi thung.

ZPM Party hian nimin khan Aizawl-a an Party Office-ah Chhung Inkhawm neiin he hunah hian an President Lalliansawta chuan kumin-a Lok Sabha inthlan lo awm turah an Party Candidate chu Richard Lalhmangaiha (Richie-a) tia koh chu a ni dawn tih sawiin, amah hi Aizawl Venghlui a cheng, Wg. Commander Lalzawma fapa a ni tih a sawi a. Richard Lalhmangaiha hi MAMCO ah Asst Manager niin kum 2015 khan Early Retirement in a chhuak a, contract hna hrang hrangah thiante nen in thurualin an thawk thin a, zirna lamah B.Com a ni.

He hunah hian Richard Lalhmangaiha chuan a hmathlir zingah thingtlang loneih tih rehna atan permanent farming siam leh loneitute thlai thar hralhchhuahna tur Market mumal tak siam nana pawimawh thingtlang lama Warehouse leh Kudam changtlung taka siam te, Mizoram chhunga thlai thar te a hlutna tipung tura sawngbawl leh a tul anga hmalak bakah Mizoram buhfai thar te felfai taka pack anih theih nan Rice Mill siam te, Mizoram-a thalaite eizawnna lama hma an sawn theihna tur te, District tina JNV School din chu Central Policy anih angin District thara hmalakna kalpui bakah Mizoram artui leh arsa lama intodelh tura theihtawp chhuah tura hmalak a tum thu te a sawi bawk a ni.

Hetihlai hian Mizoram Lok Sabha MP nilai C. Lalrosanga chuan kumin-a Lok Sabha inthlan lo awm turah chuh a tum tawhlo tih nimin-a MNF party im Mizo Hnam Run chhung inkhawm an neih ah a sawi a. Lok Sabha MP chuan MP inthlan lo awm turah, mifel, tha leh thiamzawk te kianin, an hotute hnenah chawlh a dil tih sawiin, mipuite rilru fim tak pu a ngaihtuahna thar hman a tul hle tih a sawi a. Central politics thlirin, BJP/NDA thawm a lian hle tih pawh sawiin, Inthlan puan anih hma in 'Citizenship Amendment Act' chu a hman dan tur an peihfel thawkhat tawh avangin hman ngei an tum nia a lan thu leh Zoram mipuite rilru siam lawk a tul thu a sawi a ni. Lok Sabha MP C. Lalrosanga chuan Manipur chungchangah thusawina hun an pe ve duhlo tih sawiin, a zawhna an chhang ngailo niin a sawi a, NDA Meeting-ah hun an pe lo tih sawiin, All Party Meeting-a thu a sawi chu engah mah ngaih a ni lo niin a sawi a. Hnam thila nghet taka an din a huai taka an auchhuah avangin Vawiin thlengin a la inchhir lo tih a sawi a, kum 1950 hnu lamah Lok Sabha vawi 17-na chu Sitting tlem ber tum a nih thu a sawi bawk.