PC Party Candidate tur Rita Malsawmi

Mizoram Lok Sabha Inthlanpui neih turah PC Party chuan Rita Malsawmi (49) D/o LT. Muana (L), Kolasib Venglai, tuna Laipuitlang, Aizawl-a khawsa mek chu an Candidate tur a nih thu an puang.

Nimin khan Kolasib Press Club-ah PC Party President Vanlalruata chuan Lok Sabha Inthlanpui-a an candidate tur hi puangin, “Kan Candidate hi thlantlin anih chuan Aizawl-ah MP Office a hawng dawn a, MP zawng zawngin anmahni Bial-a Office an neih vekna tur Dan siam anih theihnan hma a la dawn,” a ti a. Hei hi a hlawhtlin ngei an rin thu sawiin, “Hemi avang ringawt pawh hian MP zawng zawngin role model-a an neih, history bung thar siamtu a ni dawn a ni,” tiin vote theuh turin mipui a sawm a ni.

He hunah hian an Candidate tur Rita Malsawmi chuan Mizoram MP mai ni lovin Zofa zawng zawng leh India ram Kristian zawng zawngte tan MP a ni dawn tih sawiin, Mizoram hmasawnna tur te, Zofate himna tur te leh Hindutva dolet tura nasa taka ke a pen theih nana MP nih duh a nih thu a sawi bakah amah vote turin mipui a sawm bawk a ni.

Rita Malsawmi hi LT Muana (L) leh Vanlalruati, Kolasib Venglai te fanu niin, November ni 22, 1975 khan Hortoki-ah a piang a, zai leh hla phuah lamah mi te hriat lar hmasak niin State pawn lama a zai thin bakah Modelling lamah pawh a sul sutute zinga mi a ni a. Mizoram-a a rawn chhuah hnuah DDK-ah News Correspondent hna te pawh a thawk thin a. Social work lamah Joshua Operation-ah President nilai niin, ZORO-ah kum 10 chuang Secretary nihna chelh tawh a ni.