Ni 3 chhung awh tur DAY-NULM Festival (Exhibition-cum-Sale) 2024 Serchhip-ah neih tan a ni

Urban Development & Poverty Alleviation Department buatsaih ni thum chhung awh tur ‘DAY-NULM Festival (Exhibition-cum-Sale) 2024’ chu nimin khan Serchhip Bazar chung zawl-ah neih tan a ni a, Serchhip Addl. DC James Lalnithanga chuan he Festival hi a hawng a ni.
DAY-NULM Festival (Exhibition-cum-Sale) 2024 hawnna hunah hian Serchhip Addl. DC chuan hetiang hun buatsaih leh theih a ni chu lawmawm a tih thu sawiin, hlawhtling taka hman a nih theih nan duhsakna a hlan a. Khawpui chhunga chengte retheihna atanga chhanchhuaha eizawnna siam sak chu DAY-NULM thiltum a nih thu sawiin, Sawrkar laipui atangin Scheme chi hrang hrang a lo kal thin thu leh heng te hi kan in tun nunna atan eng tiangin nge kan hman tangkai ang tih chu kan lo ngaihtuah ve a pawimawh thu a sawi a. Hemi atan hian Scheme kalphung leh a thil tum te mipui ten kan lo zirchian bakah sawrkar Department-a a bauipuitute pawhin an hriatchian a tul thu a sawi a. Chutiang bawkin mipuite pawhin sawrkar in ruahmanna a siam te rinawmna nena kan bawhzui a tul thu sawiin, midang tana ni lo, mahni tana thawk kan ni tih kan hriat a tul thu leh pawl anga hmalakna a nih phei chuan thawhhona tha kan neih theihna tura ngaihtuahna kan sen a pawimawh thu te pawh a sawi bawk.

‘DAY-NULM Festival (Exhibition-cum-Sale) 2024’ hawnna hun hi District Urban Development Officer, Gaston Vanlalhriatpuia chuan kaihruaiin an Department kalphung leh an hmalakna te a sawi a. An Department hnuaiah hian mirethei te chawikanna kawngah hmalakna chi hnih a awm thu leh hemi hnuaiah hian Component hrang panga (5) a awm thu a sawi a. Heng Component hrang hrang hnuaia hian khawpui-a mirethei te tan thiam thil zirna buatsaih thin a nih thu te, sumdawnna atan Loan pekchhuah thin a nih thu te, Street Vendor te tan permit pein an hmasawnna atan hmalak a nih thin thu te, Shelter for Urban Homeless hnuaiah Home hrang hrang pasarih (7) te chu an mamawh bungrua te pek thin an nih thu leh DAY-NULM hnuaiah hmeichhia ten eizawnna an neih theihna atan hmalakna kalpuiin hemi hnuaiah hian tuna Festival pawh hi an buatsaih thu leh nikum lamah a hmasa ber atan pawh buatsaih a lo nih tawh thu a sawi a. Nikum khan bungrua chi hrang hrang Rs. 2,40,000 man hralhchhuah a nih thu a sawi bawk.

Nimin-a hawn tak DAY-NULM Festival-ah hian dawr 20 a awm a, UD&PA hnuaia thiamthil zirchhuak te leh Self Help Group te siam chhuah thil chi hrang hrang phochhuah niin, a duh apiang tan lei theih a ni a. He Festival hian tunkar Zirtawpni, March 15, 2024 thleng a awh dawn a, Zing dar 10:00 atanga tlai dar 5:00 bawr vel thleng mipuite tan tlawh theih a ni ang.