Mizoram State Policy Coordination Committee leh State Project Monitoring Committee thutkhawm nei

Mizoram State Policy Coordination Committee chu nimin khan an Chairman leh Chief Minister Lalduhoma hovin an thukhawm a, nimin vek khan Mizoram State Project Monitoring Committee pawh thukhawmin an hnathawh dan tur hrang hrangte inhrilh hriata sawiho a ni.

Mizoram State Policy Coordination Committee thutkhawm ah hian Chief Minister Lalduhoma chuan an hnathawh ber tur chu Hand Holding Policy enkawl a ni tih sawiin, “Concern Department te hmalakna a tul angin kan enpui ang a, thurawn pek te leh hmalakna kal kawppui theih chi te, Central lama Funding Source zawn belh thlengin kan thawk dawn a ni,” a ti a. Committee Member te chu mithiam ber ber thlankhawm an nih thu sawiin, “Hnathawh dan awlsam leh rang, rintlak si hmanga sawrkar policy pui ber hi kalpui tum ila theihtawp kan chhuah dawn nia,” tiin Member te a chah a ni.

He thutkhawm ah hian Mizoram State Policy Coordination Committee Vice Chairman, Dr. KC. Malsawmzauva, Adviser to CM pawhin hmalak dan tur an chhawpchhuah tlangpuite a sawifiah a, chumi zawhah thil pawimawh hrang hrangte relin Concern Department turte an thlang fel a, a rang lama meeting neihpui ni se an ti. Mizoram sawrkar hian Hand Holding Policy atan sawrkar kumthar budget ah cheng vbc. 200 a dah a, kumin hi Year of Consolidation a nih avangin Pilot Project angin kalpui phawt tur a ni.

Nimin vek khan Mizoram State Project Monitoring Committee pawh Chief Minister leh an Chairman, Lalduhoma hovin CM Conference Hall-ah an thukhawm bawk a, he hunah hian Chief Minister chuan mipui sawrkar din an tum tlat tih sawiin, “Kan rama hmasawnna hnathawh mekte chak taka a kal a, huntiam chhunga hna kan zawh thin theih nan leh hmasawnna hmel thar kan hmuh thuai thuai theih nan he Committee hi din a ni,” a ti a. Eirukna dona tha lutuk a nih thu sawiin, Party aiawhte, Tlawmngai Pawl aiawhte, Kohhran aiawh thlengin Member an ruat a, a tul angin Member hi la ruat belh theih a ni tih a sawi a. “Kan thuneihna pawh a zauva, dik taka hna kan thawh phawt chuan kan State hian nasa takin kan hlawkpui dawn a ni,” a ti a. “Vawiin ah member zawng zawng huapin Committee kan han thukhawm a, a lawmawm hle. Kan hmalak chhoh dan tur hrang hrangte inhrilhhriatna kan nei ang a, tul dang awm apiangte pawh kan sawi dawn nia,” tiin Member te chu a chah bawk a ni.

He thutkhawm ah hian Mizoram State Project Monitoring Committee Vice Chairman RL. Rinawma chuan Project endik theih an khawnkhawm tawh te, endik dan kalhmang tur an duan te, Team hrang pathuma an inthendarh dan te a sawifiah a, Member ten an rawtna hrang hrang an neih te pawh sawiho a ni bawk.