Ni 100 chhunga tih hlawhtlin tur duan lawk tih hlawhtlin zel avanga lawmthu sawina Resolution pass a ni

Nimin-a Mizoram Legislative Assembly thutkhawm ah South Tuipui bialtu MLA Jeje Lalpekhlua Private Member Resolution putluh, ‘Ni 100 chhunga tih hlawhtlin tur Sawrkarin a lo duan lawk tih hlawhtlin a ni chho zel hi a lawmawm kan ti,’ tih chu nimin khan House chhunga sawiho a nih hnuah pass a ni.

Nimin-a Assembly thutkhawm ah hian South Tuipui bialtu MLA hian a Private Member Resolution hi putlutin, ni 100 chhunga tih tur Chief Minister in point 12 a puang chu ropui a tih thu leh mipuite pawhin kan la hmuh leh hriat ngai loh a nih thu a sawi a, hemi a hlawhtlin ngei theih nan State sawrkara ‘General Monitoring Committee on Chief Minister 100 days Program’ chu din a ni a, hei hian Chief Minister in ni 100 chhunga a tihtur hi a tih mai mai loh zia a lang thei a ni, a ti a. India ram leh khawvel zau zawk thlir chuan he thil hi thil thar a ni lo tih sawiin, chona sang tak insiam ngam sawrkar an nei chu mipuite tan pawh a thlamuan thlak hle tih a sawi a, sawrkar in a tuk mai atanga umzui leh tih hlawhtlin a ni chho zel chu ropui a tih thu pawh a sawi bawk a ni.

He Resolution sawihona hunah hian Opposition Leader Lalchhandama Ralte chuan, Sawrkar chuan mipuiten an fak hun nghak zawk tura a ngaih laia ni 100 pawh a tlin hmaa mahni infak chu an tan pawmpui chi a ni lo tih a sawi a, ni 100 chhunga tih tura an puan zinga mi MSSSB thiah chu an duhloh avangin Private Resolution an pulut tawh tih sawiin, Zirlai mangang mek te aw hriat lai leh kuthnathawktu Hmunphiah ching te mangan mek laia lawmthu sawi chu an thiam ve dawn lo tih sawiin, kuthnathawktu mangang te leh zirlai mangang te lamah an tang tlat tih a sawi. Opposition Leader chuan thlai thar pali lei tur chu sawrkar kum tharah ni lovin, ‘tun Financial Year-ah a ni’ tih Larsap in chiang takin a sawi tih pawh sawiin, RR Associate mawhpuh ngawt lovin mipuite harsatna tawh mekah mawhphurhna an lak ngam ngei a beisei tih a sawi a. Sawrkar inrenchem kum chu a thu chuan a tha tih pawh sawiin, MNF Ministry pawhin Congress kum 10 hnuah Car thar an lei thu leh MNF chu kum 5 chauh a sawrkar avangin Car thar lei hun ala ni lo niin a sawi a. Sawrkar thara Board hrang hrang ah MLA rual an awm teuh laia mihrang pawisa sen belhna tur leh midang duhsakte pek belhna tur chuan inren lam a kawk lo niin a sawi bawk.

House Leader, Chief Minister Lalduh-oma chuan 100 days program ami chu sawrkar hmasa ten an tihloh hlir a nih thu sawiin, thil awlsam nia sawi ni mahse tumahin an tih theihloh avanga hma la an ni tih a sawi a. DPR thehluh chiama hmasawnna hnathawh tam tak aiin ram tana tha tur zawk an ngai pawimawh tih a sawi a. Motor neih tur zat aia tam nei anga an sawi chungchang sawiin Chief Minister chuan Motor an kawl mek chuan spare a nei tih sawiin, pakhat leh a spare neih chu kalphung a nih thu leh spare neilo in tumah an awm ngailo tih a sawi bawk.

Chief Minister Lalduhoma chuan MLA in Free Travel cheng nuai 2 thleng an neih chu a bak an zin anih chuan mahni pawisa hman mai tur a nih thu a sawi a, Budget-a ziah lan si loh Sawrkar laipui atangin Mizoram khaw 273 tan cheng vbc. 55.18 sanction a ni tawh tih a sawi a, hemi atana First Instalment cheng vbc. 27.69 pek an ni tawh tih sawiin, Lok Sabha inthlan an puan hma in Second Instalment hmuh leh theih nan Sawrkar laipuiin hman-hmawh turin an ti tih a sawi a. Finance Ministry in pung awm lo Loan Handholding-a beneficiary ten an puk tur an pe dawn tih pawh sawiin, USA atangin Handholding-ah pawisa a thlawna puih tumna an dawn thu leh an dah bakah an hmuh belh mek zel tih a sawi bawk.

Resolution hi Member ten an sawiho hnuah tawngka hmanga Vote lak niin House chuan a pass ta a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar