ITI leh Polytechnic sak la zawh loh leh hman tangkai loh a tam tih Chief Minister in a sawi

Chief Minister Lalduhoma chuan kum 2015-a MSDP Scheme atanga ITI leh Polytechnic building tur sak tan la zawh loh leh hman tangkai loh a tam thu a sawi.

Nimin-a Assembly Inkhawm zawhna leh chhanna hunah Tuichawng bialtu MLA Rasik Mohan Chakma chuan kum 2015-a MSDP Scheme hmanga Kamalanagar, Chawngte-a ITI leh Polytechnic building leh Quarters tur an sak, enkawltu tumah an awm loh leh a chhiat nual tawh thu sawiin, Department-in a hriatpui leh pui loh LESDE Minister a zawt a. LESDE Minister Lalnghinglova Hmar chuan LESDE sum a sak leh enkawl a nih loh thu sawiin, a satu chu Lawngtlai DC lam a nih thu leh sak a nih tur thu pawh LESDE lam hrilh an ni lo tih a sawi a. Zin remchan ah an la en tur thu leh engtianga kalpui zel tur nge tih te pawh la sawiho tur a nih thu a sawi bawk.

LESDE Minister chuan Champhai, Serchhip, Mamit leh Kolasib-a ITI Building te chu tun dinhmunah sak mek zinga mi a nih thu pawh zawh belhna chhanga sawiin, Champhai-a ITI Building-ah hian raltlan thahnem tak an awm thu leh heng mite hi dahluh an nih dawnin Department chu rawn an nih loh thu a sawi a, hei vang hian an lakchhuah hun tur pawh hriat mai theih ala nih loh thu leh an awmna tur hmun tha zawk chu awm se chhuahsan tawh se an duh thu a sawi bawk. LESDE Minister chuan Aizawl-a ITI Building chu tih changtlun tum a nih thu pawh sawiin, Chief Minister hriatpuina in hemi atan hian hmalak mek a nih thu pawh a sawi bawk.

MSDP Scheme atanga ITI leh Polytechnic building chungchang hi Chief Minister Lalduhoma chuan sawi zuiin, Building sak hna zawh loh a tam thu a sawi a, “Sawrkar hmasa lamah PAC Chairman ka nih ve laiin kan tlawhchhuak deuh vek. Department hotute kam khatin, Contractor-te kan hau,” a ti a, theihtawp an chhuah thu a sawi bawk. Chief Minister Lalduhoma chuan sawrkar atanga tum tak takna a awm loh chuan thil tih a sawt loh thu pawh sawiin, “PAC atanga recommendation siamin a thawk thui lo, hna a thawk thui thei lo,” a ti a.

Chief Minister sawi danin, Zote-ah engemaw chen an sa zo a, kawng khar an ru a, wiring-te pawh chah niin, a panna kawng a chhe leh tawh. Hetihlai hian a bulah building dang an sa leh mek. Tlangsam-ah sak zawh tawh sa a awm a, eng atan mah hman loh a awmin a ruak ringawt a. Chhiahtlang-ah an la zo lo, hun an pawtsei zel, an zo thei lo,” a ti a. Hetiang a nih avang hian ITI leh Polytechnic kan entrepreneur-te mamawh ngawih ngawih Institution hi hna a chak loa, a buai tih sawiin Chief Minister chuan, “Kan endik leh ang a, Contractor ho kan Terminate mai dawn nge, enzui ngai a awm,” a ti bawk.

Comments

Popular News (Last 30 Days)

Vawiin-ah HSSLC Exam result