MSSC thutkhawm neih a ni

Mizoram State Sports Council (MSSC) Executive thutkhawm chu Inrinni khan Sports Minister Lalnghinglova Hmar hovin Aizawl Republic Veng-a Hawla Indoor Stadium-ah neih a ni a, MSSC President ni mek Sports Minister Lalnghinglova Hmar chuan infiamna lamah tih tur hrang hrang a tam thu sawiin, heng zingah hian hruaitu nih chu duhthlanna a ni a; mahni tha sen leh inpekna zawng zawng a man hmuhlet tuma pawl hruai a nih chuan mi inpekna thinlung a fuh lo, a ti a. Chutiang hruaitu Sports Association zingah an lo awm a nih chuan an chawlh hahdam mai a tha zawk ang, a ti bawk. MSSC Executive Meeting-ah hian Sports Association thenkhat MSSC pawmpuina pek chungchang te, Sub-Committee peng din chungchang te, Mizoram Incentive Cash Award Scheme 2020 te, National Championship-a Infiammite chet that dan azira Sports Association tanpuina pek dan chungchangte leh thil dang sawiho a ni.