BCM Assembly vawi 128-na tluang taka zawhfel a ni

Baptist Church of Mizoram (BCM) Rorelna sang, BCM Assembly vawi 128-na chu nimin Pathianni hmanga neih chu nizan khan a tiak ta.

BCM Assembly vawi 128-na hi Nilaini kalta zan atang khan BCM Biak In, Electric Veng Lunglei-ah neih niin Ningani atang khan Palai ten ni thum chhung ro an rel a, nimin Pathianni khan Pastor leh Minister nemngheh inkhawm (Ordination Service) neih a ni a, tun tumah hian Minister atan mi 15 nemngheh niin, an zinga 12 te chu Probation hun hmang zo tawh, Pastor Bial a awm turte an ni a, an zingah hian Serchhip District chhung North Vanlaiphai Bial-a awm tur Rev. F. Lalramzauva leh Khumtung Bial-a awm tur Rev. V. Lalrozuala te an tel a. Midang pathum te chu AICS a Assistant Professor hna thawk mek an ni thung.

BCM Assembly thurel langsar zingah BCM hnuaia zirna In hrang hrang – AICS, HATIM, BHSS, BES leh Christian Hospital te dinhmun zirchianna neih ni se tih te, Zochachhuah-ah Guest House sak te, Beihrual thuzir-ah BCM kalphung leh inrelbawl dan zir te, kan rama eirukna hluar lutuk tibo tura hmalak te, Aizawl a Counseling Centre hawn te, rampum huap awmni khama tawngtaite, BCM pum huapa khua leh tui tha leh nun dan mawi inzirtirna neih te a tel a ni.

Report-a tarlan a nih danin Baptist Church of Mizoram (BCM)-ah hian ABC 17 awmin, Pastor Bial 92 leh Tualchhung Kohhran 678 an awm a, Kohhran member zawng zawng 1,79,280 niin, kum hmasa aia member punna chu 2876 a ni. AGS – Mission Report chuan Mission Field hrang hrang 25-ah rawngbawl mek a nih thu te, Missionary leh Mission hnuaiah  thawktu mi 1343 an awm thu te, kum 2023 chhungin Kohhran thar 16 leh Fellowship 15 dinin, ringthar 4689 an awm thu a tarlang bawk.