Mizoram-a NHM hnuaia hmalak dan thlirlet a ni

Mizoram-a National Health Mission (NHM) hmalakna thlirletna hun chu nimin khan Aizawl-ah neiin Health Minister Lalrinpuii chuan he hun hi a hmanpui a ni.

Directorate of Hospital & Medical Education Auditorium-a National Health Mission State Level Review Meeting-ah hian Health Minister chuan NHM chu Centrally-Sponsored Scheme (CSS) a nih thu leh Mission Mode-a kal pui a nih thu a sawi a, National Health Programme hrang hranga target te chu Sustainable Development Goals (SDGs) nena inkaihhnawih tlat a nih thu sawiin, Programme hrang hrang ah hian Review leh Monitoring-ah tanlak chhoh deuh deuh a pawimawh thu leh Best Practices and Innovation nei tura ruahmanna fel tak neia hmalak a pawimawh thu a sawi a. Mizoram pumah Health Care Services mipuite hnenah pek thin a ni tih sawiin, hetah hian tumah hmaih lovin ‘Leave no one behind’ tih chu an thupui pawimawh tak tur a nih thu a sawi bawk. Heng bakah hian Mizoram-ah TB leh Malaria a tam thu leh helam a thawktute pawh theihtawp an chhuahna ah fakin taima leh rinawm taka thawk zel turin a chah bawk.

Health Minister chuan thawktu indaihlohna nasa tak a awm thu pawh sawiin, hemi sukiang tur hian an theih tawkin an bei ang tih a sawi a. Tele-Medicine chu Sawrkar policy-a tel anih avangin a theih ang anga ti changtlung turin Programme Officer te a ngen a, Health Programme tam tak an kalpui ah te theihtawp an chhuah thin laiin damlo enkawl nen an kaihkawp thiam a tul hle tih a sawi a. Health Department a thawktute an chhuanawm em em a, chutih rualin mipui tana thawk an ni tih hria a, thawhhona tha nei turin a chah a. Hun vawn dik kawngah hmasawn zel tura chahin, Programme Officer te leh Staff zawng zawngte chu mahni Programme theuh-a thahnemngai taka thawk tur leh Health Department tana theihtawp chhuah zel turin a chah bawk.

He hunah hian NHM-a Mission Director Dr. Eric Zomawia chuan National Health Mission hnuaia hmalakna hrang hrangte tarlangin, mpuite hriselna atana thahnem ngai taka thawktu NHM Staff zawng zawngte hnenah lawmthu a sawi a. NHM hmachhawp hrang hrang te leh hmasawnna tur hrang hrang te a sawi bawk. NHM Mizoram hnuaia RCH Programme chuan tehfung hrang hrangah North East State zinga titha ber niin lawmman pakhatna ‘7th JRD Tata Memorial Awards’ dawng theia kan awm chu lawmawm a tih thu a sawi bawk.

Mizoram-ah hian ‘Health Minister Special Award’ siam niin NHM Mizoram hnuaia hmun harsa leh khrihkhan taka rinawm leh tha taka thawktu mi 9 hnenah he Award hi Health Minister hian he hun hmanna ah hian a hlan nghal bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man