Mizoram Power leina man ba cheng vbc. 144 chuang March thla chhunga rulh zawh hman tum a ni

Power & Electricity Department changtu Minister F. Rodingliana chuan P&E Department in Power leina atangin Rs. 144,25,08,760 ba a nei mek tih Assembly House-ah sawiin, Power bill ba nei lo tura hmalak a nih thu leh tuna ba awm mek te hi March thla chhunga rulh zawh hman tum a nih thu a sawi bawk.

Nimin-a Mizoram Legislative Assembly thutkhawm ah Aizawl South-II bialtu MLA Lalchhuanthanga zawhna chhangin P&E Department changtu Minister F. Rodingliana chuan tun dinhmunah P&E Department in Power leinaa ba an neih zat chu kumin February 16 thlengin, Generating Company-ah Rs. 127,08,09,493; Transmission Company-ah Rs. 16,67,16,173 leh North East Load Dispatch Centre (NERLDC) ah Rs. 49,83,094, a vaiin Rs. 144,25,08,760 a ni tih a sawi a. Power bill ba nei lo turin ZPM sawrkar chuan policy-ah an dah tih sawiin, Chief Minister hmalakna in kumin March thla chhung hian Power leina ba hi rulh vek an tum tih a sawi bawk.

Zawh belhna chhangin Power & Electricity Department chu Corporate-a leh tumin hemi lam hi an hawi tan tih a sawi a, Power-a intodelh phawt a, chumi hnua hmalak turin an inbuatsaihna kawng tinreng chu Corporate lam hawi zawng zel a ni tawh tih a sawi bawk. Khawpui chhunga Hrui hlui chu Revamped Distribution Sector Scheme (RDSS) hmanga thlak mek a nih thu pawh P&E Minister chuan sawiin, tunah hian KM 20 vel hrui thara thlak mek a nih thu a sawi bawk.

Hei bakah hian Chhim lam ten Power Supply an hmuh that loh chungchang Member ten an sawi chu a hrui a hlui hlawm tawh tih P&E Minister chuan a sawi a, Disc te pawh chhiain ruahsur loha Current kaltlang kha ruah a surin a disc khi ah current a lo leak thei a, sum awm ang angin thlak mek a ni a, Thal chhunga siam zawh hman a ni mai tih leh an ngaih pawimawh thu a sawi bawk a ni.

Member te zawhna chhangin P&E Minister F. Rodingliana chuan Electric Current kal dik loh vanga Consumer-te bungrua a chhiatin sawrkarin zangnadawmna a ngaihtuah sak thei tih sawiin, Electric Current kal dik lo chu a chhan leh vang hriat hmasak a ngaih thu leh Dan kalha mipui leh Consumer-ten Wiring leh Connection tidanglama an lo khawih chingpen chuan dan anga hrem theih an ni zawk tih a sawi a. Electric Current kal dik loh vanga Consumer-te bungrua a chhiatin Complaint theih a ni a, a hun chhung awm hran lovin a ngaihtuahtu tura ruat Redressal Committee-in a chhan leh vang uluk takin a zirchiang a, hma a la thin tih a sawi a. Zangnadawmna pek theih zat hi Committee rel ang leh a thil chhe zat anga chhut a ni tih a sawi bawk.

Hmun tinah Transformer a indaih lo tih pawh Minister chuan sawiin, Transformer zaa 68 vel chu kum 20 hmalama lei tawh niin, hei hi a that hun chhung tura ngaih a ni a, a tam zawk chuan kum 20 a pel tawh avangin sawrkar tharin Transformer thar lei nan cheng vbc. 7 a dah a, mamawh leh tul zual thlak tum a ni tih a sawi bawk.

Electric Bill sang nia sawi chungchang ah P&E Minister chuan System dik lo te pawh a lo awm thu leh siam thar leh a nih thu sawiin, “Khawl thil te a ni a, a mumal lo ve zeuh zeuh,” tiin an lo ennawn tur thu a sawi a. Kawlphetha kan hman man chu kan chawi tur a nih thu sawiin, a hman man chhutna rate chu a ngai renga an kaltir dawn thu a sawi a. Smart Meter vuah tura hmalak a nih thu leh Central-ah an dil mek a nih thu sawiin, an hlawhtlin ngei pawh an beisei thu a sawi a, hei hian Electric Bill sang vak thin pawh a chinfel ngei an rin thu a sawi a. Hemi hman theih hunah chuan Pre-Paid a bill pek pawh a keng tel dawn a ni, a ti. Khaw pakhat tana Transformer lian pakhat dah chu a chhiat palha tuar an tam thin thu a sawi bawk.

Comments

Popular News (Last 30 Days)

Vawiin-ah HSSLC Exam result