Hand Holding Policy in entreprenuer tha te dap chhuaha, ding chhuak tura tanpui a tum - Chief Minister

Chief Minister Lalduhoma chuan, “Hand Holding Policy in a tum ber pakhat chu entreprenuer tha te dap chhuaha, ding chhuak tura tanpui a ni,” a ti.

Chief Minister hian Inrinni khan Zuangtui Industrial Estate-a FK Toughened Glass Factory thar leh FK Oxygen leh FK Roof te chu hawngin he hunah hian Chief Minister chuan Mizoram sawrkarin Entreprenuer tha te a ngaihpawimawh thu sawiin, “Hand Holding Policy in a tum ber pakhat chu Entreprenuer tha te dapchhuaha, dingchhuak tura tanpui a ni a, thalaiten he kawng hi rawn zawh uar sauh sauh se kan duh a ni,” a ti.

Chief Minister chuan mi tumruh leh Mizoram tihhmasawn tuma mahni thiam ang anga bei thin F. Kapsanga'n Industry lama hma a lo lak tawh ah lawmthu sawiin, a nupui fanauten an chhungkaw hmalakna an chhunzawm zel chu lawmawm a tih thu leh an zarah Industry lamah Mizoram in hmasawnna kan hmu thin tih a sawi a. “Entreprenuer tha te hi an hlu em em a, eng ram pawh hian Entreprenuer tha neih tam hi an duh vek thin. Entreprenuer tha zarah ramin Industry-ah te, Service Sector lamah te hma kan sawn phah thin vang a ni,” tiin F. Kapsanga pawh Mizo zinga Entreprenuer tha ber pawl a nih thu leh kum 1960 chho atanga bul tanin Cawiin thlengin hma lam an la pan zel tih a sawi a, midang tam tak tana hna an siam bakah Mizoram siam ngei thil tam tak kan neih phah tih a sawi bawk.

FK Toughened Glass Factory, FK Oxygen leh FK Roof hawnna ah hian Factory enkawltu ber leh F. Kapsanga fapa, F. Lalmalsawma chuan Technical Report pein Darthlalang pangai aia tha zawk, a lo keh palh pawha mihring tana hlauhawm loh tur, darthlalang pangngai let sarih a chak zawk siam ve tha an tih thu sawiin, Mizoten Assam atangin kan chah thin a, kan mamawh hunah a rawn thleng lo fova. Chu harsatna sutkian nan chuan hma an la tih a sawi. An khawl thar hian 4x8 feet thlenga lian darthlalang a tichak thei a. A khawl hi Gujarat atanga an lei a nih thu a sawi bawk.

He hunah hian F. Kapsanga fapa leh Commerce & Industry changtu Minister F. Rodingliana chuan a pa, F. Kapsanga'n Industry a din chhan nia a hriat chu zalen taka hna tangkai tak thawh nia a hriat thu a sawi a. Industry hi hna zahawm, hlawk leh ram tana tha si a nih avangin hnam dangte pawhin an zah thin hle a ni, a ti a. State dangin Industry neitute an tanpui nasat thinzia a taka a hmuh thin thu sawiin, Mizoram sawrkar pawhin Industry lama kan than zel theih nan nasa zawka hmalak a tum thu te a tarlang bawk.