Kumin ah Chhiah vbc. 1,098 chuang hmu tawh

Mizoram sawrkar-a Taxation Department chuan sawrkar kum kal mek, 2023-24 a Chhiah hmuh tura target an neih cheng vbc. 1,098.50 a nih laiin tun thlenga Chhiah an hmuh tawh zat chu Rs. 10,26,23,99,387 (vbc. 1,026.23) a tling a, hei hi za zela 93.42 a ni.

Mizoram sawrkara Taxation Department hian Chhiah chi hrang hrang - GST, Profession Tax, Sales Tax, Entertainment Tax leh thil dang atangin Chhiah a la thin a, Chhiah hmuhna pui ber chu GST a ni. Kum kal mek 2023-24 ah hian February, 2024 thlenga GST atanga chhiah hmuh tawh zat chu Rs. 8,86,01,51,286 a tling a. Profession Tax-ah Rs. 15,09,75,814/- hmuin Sales Tax-ah Rs. 1,25,10,48,067/-; Entertainment Tax-ah Rs. 30,000/- leh Chhiah dang Rs. 1,94,220/- an hmu tawh a, an Chhiah hmuh tawh zawng zawng hi Rs. 10,26,23,99,387/- a ni.

Kum kal mek chhunga chhiah an hmuh tam ber thla chu April, 2023 niin hemi thla hian chhiah Rs. 1,34,78,34,419/- an hmu tling a, an hmuh tlem ber thla, November, 2023-ah Rs. 63,53,71,252 an hmu bawk a. Taxation Department-in kumin kumtira target a neih zat chu cheng vbc. 1,000 niin hei hi an tlin tawh a, hei vang hian target an neih hi tihsan (Revised Estimate) niin, cheng vbc. 1,098.50 target pek an ni a. Target (RE) an neih hi March thla Chhiah la hmuh tur nen an tlin theih ngei beisei a ni bawk.

Taxation Department hi May 20, 1988 khan Excise Department atanga indangin sawrkar tan Vawiin thlengin Chhiah la luttu Department pawimawh ber a ni a. Commissioner of State Tax kaihhruaihna hnuaiah Zone 14-a then a ni a. Aizawl District-ah Zone pali awmin, District dangah Zone pakhat theuh a awm a. District thar pathum, Hnahthial, Khawzawl Ieh Saitual-ah te Zone thar siam a ni tawh bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar