Assembly House-ah In sak tanpuina sawiho a ni

Rural Development Minister Prof Lalnilawma chuan PMAY (Rural) kaltlangin Mizoram-ah chhungkua 24300 in tanpuina instalment an dawng tawh tih a sawi a, Chief Minister Lalduhoma chuan tanpuina dawngtu tur Account tih danglam emaw a awm a nih chuan a tul anga action lak a nih tur thu a sawi bawk.

Nimin-a Assembly inkhawm ah Siaha bialtu MLA Dr. K. Beichhua zawhna chhangin RD Minister Prof. Lalnilawma chuan PMAY (Rural) kaltlangin Mizoram-ah chhungkua 24,300 in tanpuina an dawn tawh thu leh tanpuina dawng thei tura Management Information System (MIS)-a dahluh chu 29,967 an nih thu a sawi a. PMAY (Urban)-ah chhungkua 36,536 in instalment an dawn tawh thu leh tanpuina dawng thei tur MIS-a dahluh chu 37,244 an nih thu a sawi a. A hmaa IAY tih thin, kum 2016-2017 a PMAY tih a nih hnuah instalment kalphung her danglam deuh a nih thu sawiin, tunah hian instalment thuma pek a ni tih a sawi. A beneficiary thlan danah Minister leh MLA te inrawlh theih a ni lova, hei vang hian kan ngaihthah deuh em tih ngaihdan a awm tih a sawi bawk.

RD Minister chuan PMAY-Gramin bikah target chhungkaw 29967 atang hian 2024 January 1-a Completion Rate chu 8253 a nih thu leh a puma la zawh loh 21714 a nih thu a sawi a, sawrkar thar hnuaiah March 12 thlenga Final Instalment pek theih tur chu 15,975 niin, January atanga tun thlengin 7722 zo thei turah an ngaih thu leh hmabak 14019 a la awm dawn tih a sawi a. In sak dan hi a hmunah enfiahin Geo Tagging tih a ngai a, sa miah lo chuan instalment dang an dawn theih loh thu leh Beneficiary-te Bank Account thlak tih chungchang Department-in a hriatpui lo tih a sawi a, an ngai thutak hle tih a sawi a ni.

Congress Member C. Ngunlianchunga chuan account thlak chungchangah hian Department mi ten an hriatpui loh chuan VC chauh chuan an thlak theih a rin loh thu sawiin, a thlaktu hi Department lam an nih a rin zawk thu a sawi a. RD Minister chuan, thil kal dik lo chu a lo awm ni ngeiin a ngaih theih thu sawiin, thil dik lo awm chu tih dik ngei an tum tur thu a sawi a. Tihsual palh a awm theih thu leh tisual luite erawh an hrem ve ang tih a sawi a ni. House Leader, Chief Minister Lalduhoma chuan Account tihdanglam emaw account neitu hming thlak emaw a awm chuan inhriattir nise, a tul angin action an la dawn tiin House a tiam a. Beneficiary-te hi Congress hunlaia thlan an nih thu leh an zingah thi leh pem an awm chuan District tinah DC hoin a aiawh tur an thlang leh thin tih a sawi a. He Scheme hrim hrim hi Zopa rilru nen a inmil lo tih pawh sawiin, 1st instalment hmanga sak tur chin an bituk a, sak zawh nghal an awih lo hrim hrim a,.sSa zo nghal chuan an dawng nawn thei tawh lo tih a sawi bawk.