MCTA in CM hnenah thlen

Chief Minister Lalduhoma chuan nimin khan Mizoram College Teachers' Association (MC-TA) hruaitute chu Assembly House CM Recess Room-ah kawmin an harsatna thlen te a ngaihthlak sak a, MCTA hruaitute chuan ram mamawh mila UGC dan ang thlapa Zirtirtu lak (direct recruitment) zel tha an tih thu Chief Minister hnenah thlenin, Zirtirtu chi hrang tam lutuk chu tha lova an hriat thu leh hei hian kan Higher Education quality a tichhia nia an ngaih thu an sawi a. “Kan thalai lehkhathiam ber ber ten College zirtirtu nih an chak loh phah deuh niin kan ngai a ni,” an ti. Heng bakah hian an kaisanna thil te, an zinga Senior deuh te Department lama awm ve tha an tih thute, Pension an tam avanga zirtirtu lak belh a tul thute leh thil dang te Chief Minister hnenah hian an thlen bawk a. Chief Minister chuan sawrkarin Mizoram Education Service siam a tum thu MCTA hruaitute hi lo hrilhin, an thil thlen te chu mithiam zawkte nena an lo zirchian tur thu a hrilh bawk a ni.