A vawi khatna atan World Kidney Day hman a ni

Khawvel puma ‘World Kidney Day’ puala hun hman thin chu Mizoram-ah pawh a vawi khatna atan nimin khan hman niin he hun hi Health Minister Lalrinpuii chuan a hmanpui a ni.

Synod Hospital Nephrology Department-a ‘World Kidney Day’ puala hun hman ah hian Health Minister Lalrinpuii chuan Kal (Kidney) pawimawhna hriat a tul thu leh Kal natna laka inven dan sawi nasat a tul thu a sawi a. Zoram mipuite'n ‘Healthy Living’ kan mamawh thu sawiin, kan taksa mamawh tawk exercise leh ei leh in tha lakluh inzirtir a tul thu a sawi a. Chu chuan tunlai natna hrang hrang - BP sang, Zunthlum etc kan tihte lakah min vengin kal hrisel tak neih nan a tangkai thu a sawi bawk.

Covid hma kum 5 chhung khan Kal thlakna atana sum sawrkar sum senral chu NOC pekchhuah dan atanga chhutin chrng vbc. 28 a nih thu pawh Health Minister chuan sawiin, senso tisangtu ber chu Mizoram chhunga Kal thlakna awm lo chu a nih thu a sawi a. Mipui mimir, mi rethei zawkte tan Mizoram-ah ngei Mizo Doctor te hmanga Kal thlak a nih theih nan sawrkarin theihtawp a chhuah thu leh Kal thlakna hmun leh hmanrua neih tumin hmalak mek a nih thu a sawi bawk a. Kal natna Benvawn (Chronic Kidney Disease) lo nei palh tawhte tan pawh District Hospital tinah Dialysis Centre dah tura hma lak chhoh zel niin, Aizawl, ZMC, Lunglei, Champhai, Kolasib-ah te chuan Dialysis tih theih a ni tawh tih a sawi bawk.

‘World Kidney Day’ hi kumtin March thla Ningani vawi hnihna ah hman thin a ni a, kumin hian thupui atan ‘Kidney Health for all’ tih chu hman a ni a, he ni puala hun hman hi Synod Hospital-a Medical Superintendent Dr. R.L.Sanghluna chuan kaihruaiin Dr Joseph Lalhmachhuana, Consultant, Nephrology chuan ‘World Kidney Day’ hman chhan leh a tum te a tarlang a. He hunah hian Dialysis patient kum 60 chuang tawhte hnenah thilpek hlan an ni bawk.