ZPM General Assembly-ah hruaitu thlanna nei

Zoram People’s Movement (ZPM) General Assembly Vawi 1-na chu nimin khan neiin kum thum chhunga an hruaitu tur thlanna neih nghal a ni.

Baptist Centre, Falkland, Aizawl-a ZPM General Assembly-ah hian ZPM Leader Lalduhoma chuan hmun hrang hrangin an inthlan hi an thlir thu sawiin, he inthlanah hian chuhtu an awm ve nual thu leh thil kalphung pangngai a nih thu a sawi a. “Keini tan chuan hmasawnna nasa tak a ni. Vawiina kan hruaitu thlanchhuah ang ang hi kan pawl hruai tura Pathian hriak thihah kan pawm tur a ni a, hruaitu thar kan thlanchhuahte pawhin tha taka party hruai turin kan inchah duh a ni,” a ti bawk.

He hunah hian Mizoram hmun hrang hrang atangin Palai 4500 bawr vel telin Mizoram College Teachers Association (MCTA) te kaihhruaina hnuaiah kum 2024-2027 chhunga ZPM General Hqrs. a hruaitu tur thlanna neih a ni a. President thlanna neih ah Vote 4491 tla in Vote nung 4479 atanga Vote 2528 hmutu, President nilai Lalliansawta chu thlantlin leh a ni a. Vice President thlanna ah Vote tla 3911 atanga Vote nung 3825-ah Vote 1735 hmuin W. Chhuanawma chu thlantlin a ni bawk a. Treasurer atan Vote tla 3337 atanga Vote nung 3312 zinga Vote 1489 hmutu C. Lalchhuanthanga chu thlantlin a ni bawk.

Nimin-a ZPM General Assembly-ah hian Vice President Rev. Dr. K. Thanzauva chuan hunserh hmangin Chief Minister bakah Minister te, MLA leh Corporator leh Councillor te an tel kim hle a ni.