Ruihhlo dona ah thawhhona tha a pawimawh thu sawi

Excise & Narcotics Minister Lalnghinglova Hmar chuan thawhhona tha a awm loh chuan ruihhlo leh a kaihhnawihte chu awlsam taka do hneh theih a nih loh thu a sawi.

Nimin tlai khan Excise & Narcotics Minister Lalnghinglova Hmar hovin, Department hotute leh Central YMA hruaitute chuan chak leh awmze nei zawka ruihhlo do dan tur chungchangah zau zawka inrawn-khawmna an nei a, he hunah hian END Minister chuan thawhhona tha a awm loh chuan ruihhlo leh a kaihhnawihte chu awlsam taka do hneh theih a nih loh thu sawiin, tha ngah leh ban nei sei zawk YMA nena thawhho chu ngaih pawimawh hmasaka neih a nih thu leh hemi avang hian he inkawmhona hun hi hman a ni tih a sawi a. Ruihhlo do dan tha leh awm ze nei zawk kalpui a nih theih nan infinchhuah tawn a tul thu sawiin, YMA hruaitute chu Excise & Narcotics Department hmalakna kawnga duhkhawp lohna leh hmasawn ngaihna lai awm angte inthlahrung hauh lova hrilhhre zel thin turin a sawm a ni.

Minister Lalnghinglova Hmar chuan Dan in a phut ang leh hmun ngaia awm reng chu ruihhlo do kawnga thil tha ber a nih loh avangin Department chhungah Transfer and Posting pawh kalpui chhoh mek zel a ni tih sawiin, Ruihhlo do kawnga theihtawp chhuaha Sawrkar puitu YMA te hmalakna fakawm a tih thu leh, duh thuhmun theuh theuh inkarah inep palh a awm loh nana tanlak tlan dan dap thiam a pawimawh thu a sawi a, thawhdunna tha zawk hnuaiah hmalakna chak lehzual a awm theih nana ngaihtuahna sen tlan a pawimawh thu a sawi bawk.

He hunah hian Central YMA President Lalhmachhuana pawhin ruihhlo dona kawnga an hmalak dan te tarlangin, Department nena thawhho kawngah an inhawn reng thu leh hei hian rah tha zawk a chhuah ngei a beisei thu a sawi bawk.