Sum dah vbc. 110 hmanga Hmunphiah lei an phut

MNF Party chuan sawrkar chu Thlai thar lei nana an sum dah Vbc. 110 hmanga Hmunphiah lei nghal vat tura an phut thu an sawi.

Nimin a thuchhuah an siamah MNF Party chuan MNF kaihhruai Sawrkar kalta khan kuthnathawktute tan tiin SEDP-ah vbc. 150 a dah diam tawh chu tun sawrkar ZPM kaihhruai in sawrkarna an chan hnulawkah pawtpengin, thlai thar lei nan tiin vbc. 110 dahin vbc 40 chu Health Care atan an dah nghal tih an tarlang a. Sawrkar chuan thlai thar lei nan cheng vbc. 110 an dah chu hmang duh lovin, Hmunphiah lei tur hian RR Associate chu a inremsiam pui chu beisei ang an thlenpui loh hnuah Society te phungbawm ah sawmin kawng kual zawk an dap leh mek thu leh Vawiin thlengin hmunphiah chingtute chuan an hmunphiah hralhchhuah hun tawh em em, chhe mai thei dinhmuna ding chu hralhna hmu mumal lovin hrehawm ti takin hun an hmang mek tih an sawi a ni. MNF Party chuan ZPM chu inthlan dawna mipui hmaa an inzawrh ang ngei khan Hmunphiah hi lei thuai tura an phut thu sawiin, “Tawngka chauha kuthnathawktute duhsak lovin, Thlai thar lei nana an sum dah vbc. 110 hmang hian Hmunphiah hi lei nghal vat turin MNF chuan a phut tlat bawk a ni,” an ti.